Бугундан айрим талабалар учун вақтинчалик автобус йўналиши йўлга қўйилди

2026/2027-ўқув йили бошланиши муносабати билан 7-сентябрдан бошлаб «Мирзо Улуғбек» метро бекати — Ўзбекистон давлат жаҳон тиллари университети йўналишида вақтинчалик автобус қатнови йўлга қўйилди. Бу ҳақда Олий таълим, фан ва инновациялар вазирлиги хабар берди.

Йўналиш бўйича асосий маълумотлар:

Қатнов бошланиши: 7-сентябрдан
Ҳаракат вақти: 07:00 дан 08:00 гача (эрталабки тиғиз вақтда)
Автобуслар сони: 4 та катта сиғимли автобус

Манзил: автобуслар талабаларни «Мирзо Улуғбек» метроси олдидан ЎзДЖТУнинг ҳар икки ўқув бинога етказади.

Йўналиш:

— «Мирзо Улуғбек» метроси;
— Тахтагул;
— ТХАЙ;
— Лутфий;
— Кўкча Дарвоза;
— Заковат кўчалари;
— ЎзДЖТУ.

Нима учун янги йўналиш ташкил этилмоқда?

Ҳозирда ЎзДЖТУ талабаларининг катта қисми университетга боришда «Чилонзор» метро бекатигача етиб келиб, ундан кейин автобусларга ўтади. Натижада эрталабки тиғиз вақтда ушбу йўналишдаги жамоат транспортларида йўловчилар оқими ортиши сабабли юклама ошади.

Янги вақтинчалик йўналиш орқали талабалар «Мирзо Улуғбек» метро бекатидан тўғридан-тўғри университетгача автобусда етиб боришлари мумкин бўлади.

Бу талабаларнинг эрталабки тиғиз вақтда университетга тезроқ ва қулайроқ етиб боришига, шу билан бирга «Чилонзор» метроси ва унга туташ жамоат транспорти йўналишларидаги юкламани камайтиришга хизмат қилади.

Эслатма: Мазкур автобуслар фақат эрталабки тиғиз вақтда — соат 07:00 дан 08:00 гача ҳаракатланади.