Тошкентда янги ўқув йили 8 балли тирбандлик билан бошланди

Бугун, республикадаги барча олий таълим муассасаларида 1-босқич талабалари учун янги ўқув йили бошланди. Ўқув йилининг бошланганлиги муносабати билан бугун, эрталаб пойтахт кўчаларида транспорт воситалари оқими сезиларли даражада ортиб, айрим йўналишларда 8 балли тирбандлик кузатилди.

Аввалроқ, 2026/2027-ўқув йилидан бошлаб Тошкент шаҳрида жойлашган ОТМларнинг биринчи сменасидаги дарслар соат 08:00 дан бошланиши белгиланган эди. Мазкур тартиб транспорт оқимини самарали ташкил этиш ва эрталабки тиғиз вақтда йўллардаги юкламани камайтириш мақсадида жорий этилган.

Шунингдек, «Тошкент метрополитени» АЖ янги ўқув йили бошланиши муносабати билан йўловчилар оқимининг ортишига тайёргарлик кўрилаётгани маълум қилинган эди.

Унга кўра, куннинг тиғиз вақтларида барча йўналишларда поездлар ҳаракати интерваллари қисқартирилган:

— Чилонзор йўналишида — 1,5–2 дақиқагача;
— Ўзбекистон йўналишида — 3 дақиқагача;
— Юнусобод йўналишида — 4 дақиқагача;
— Ер усти ҳалқа йўли йўналишида — 7–8 дақиқагача.

Маълумот учун, Тошкентдаги ОТМларда 2-босқич ва ундан юқори босқич талабалари учун дарслар 14-сентябрдан бошланади.

Эслатиб ўтамиз, Тошкент шаҳар Йўл ҳаракатини ташкил этиш маркази томонидан пойтахт кўчаларидаги транспорт оқими, тирбандлик даражаси ҳамда жамоат транспорти ҳаракати доимий мониторинг қилинмоқда. Ушбу марказ маълум қилишича, 5-сентябр куни пойтахтда тирбандлик даражаси 4–5 балл атрофида қайд этилган.