Tалабалар турар жойи учун аризалар қабули бошланди

Талабалар аризаларни my.gov.uz портали орқали юборишлари мумкин. Қабул ўқув йили якунига қадар давом этади.

Амалдаги тартибга кўра, аввало имтиёз ва устуворликка эга талабгорлар ётоқхонага қабул қилинади. Шундан сўнг қолган ўринлар умумий навбат асосида тақсимланади. Бунда ўринларнинг 55–65 фоизи 1-курс талабалари, 15–20 фоизи 2-курс талабалари, 20–25 фоизигача эса 3-курс ва ундан юқори босқич талабалари учун ажратилади.

Шунингдек, 2026/2027-ўқув йили учун олий таълим муассасаларининг 1-босқичига тавсия этилган абитуриентлар якуний натижалар эълон қилингандан кейин ариза топширишлари мумкин бўлади.

Янги тартибга кўра, талабалар учун яна бир қулайлик жорий этилди. Эндиликда талабалар турар жойига жойлашиш ва вақтинча рўйхатдан ўтиш жараёнлари ягона композит хизмат орқали автоматик тарзда амалга оширилади.

Бунда ариза маъқуллангач, талабага электрон шартнома ва йўлланма тақдим этилади. Шартномада кўрсатилган тўлов амалга оширилгач, вақтинча рўйхатдан ўтиш учун тўлов автоматик шакллантирилади. Мазкур тўлов ҳам амалга оширилганидан сўнг талабанинг турган жойи бўйича вақтинча рўйхатга олингани ҳақидаги қайд варағи электрон шаклда тақдим этилади.