1 октябр. Бугундан ўзбекистонликлар ҳаётида нималар ўзгаради?

1. Тошкентда автобус ва метро қимматлайди. Электрон тўлов 1 700 сўмдан 2 500 сўмга ошади.

2. Автобус учун ойлик абонемент 250 минг сўм автобус + метро учун 345 минг сўм бўлади. Талаба, ўқувчи, пенсионер ва ногиронлиги бўлганларга 50% чегирма бор.

3. Номингизга нечта SIM-карта очилганини my.gov.uz орқали кўра оласиз. Ишлатмайдиган рақамни ёпиш учун ҳам онлайн ариза бериш мумкин.

4. Номингизга нечта банк картаси очилганини ҳам my.gov.uz орқали текшириш мумкин.

5. Уйингиз ёки машинангизни сотиш, гаровга ёки ипотекага қўйишга my.gov.uz орқали ўзингиз тақиқ қўя оласиз.

6. Номингизга нотариус орқали бирор иш расмийлаштирилса, my.gov.uz автоматик хабар юборади.

7. Фамилия, исм ёки туғилган санангиз ўзгарса, ҳар бир идорага алоҳида бориш шарт бўлмайди. Маълумотлар давлат тизимларида автоматик янгиланади.

8. Тадбиркорга жарима солинса, унинг 50%ини бир ой ичида тўлаб, жаримани ёпиши мумкин. Қолган 50%и кечирилади.

9. Жаримани бирданига тўлаш қийин бўлса, тадбиркор уни 6 ойга бўлиб тўлаши мумкин.

10. Тадбиркордан ундирилган жарима судда бекор қилинса, пул 15 кун ичида қайтарилади.

11. Тошкентда жарима майдончасига тушган машинани чиқариш электронлашади. Рухсатнома QR-код орқали берилади, тўлов ҳам онлайн қилинади.

12. 500 минг нафар ўқитувчи, шифокор, давлат хизматчиси, ўқувчи ва талаба театр, кино ва концертларга бепул ваучер олади.

13. Ижтимоий реестрдаги 100 минг оиланинг биттадан фарзандига ҳам театр, кино ва концерт учун бепул ваучер берилади.

14. Экспортчилар учун божхона расмийлаштируви, фитосанитария сертификати, фумигация ва товар келиб чиқиши сертификати тўловлари 30%га камаяди.

15. Вояга етмаганлар ўз ҳуқуқини ҳимоя қилиш учун мустақил судга мурожаат қилса, давлат божи тўламайди.

16. Кичик ва ўрта бизнеснинг айрим кредитлари бўйича фоиз харажатларининг бир қисми қоплаб берилади.

17. Айрим тадбиркорлар 5 млрд сўмгача гаровсиз кредит олиши мумкин бўлади.

18. Электротехника корхоналари 5 млн долларгача кредитни йиллик 6%дан олиши мумкин.

19. Давлат ташкилотлари товар ёки хизмат сотиб олишдан олдин унинг бозор нархини электрон тизим орқали текширади.

20. Янги қурилишга махсус рақам берилмаса, қурилишни бошлашга рухсат берилмайди.

21. Янги қурилишларнинг рақамли паспорти бўлади. У орқали объект ҳақидаги маълумотларни кузатиш мумкин.

22. Темир йўлда ички юк ташиш учун буюртмани Давлат хизматлари маркази ёки my.gov.uz орқали бериш мумкин бўлади.

23. Сув тежовчи технологиялар ўрнатилганини назорат қилиш учун ускуналар QR-код ва GPS-трекер билан белгиланади.

24. Бухоронинг тарихий марказида электросамокат, электроскутер, мопед, рикша ва айрим бошқа транспортларда ҳаракатланиш чекланади.

25. Андижонда хусусий тадбиркорлар импорт қилинган суюлтирилган газни баллонларда аҳолига тўғридан-тўғри сотиши мумкин бўлади. Нархни тадбиркорнинг ўзи белгилайди.

26. 300 дан ортиқ бозор ва савдо мажмуасини E-bozor тизимига улаш бошланади. Унда манзил, бўш савдо жойлари ва иш вақти ҳақида маълумот бўлади.

27. Давлат улуши 50%дан юқори компанияларнинг қимматли қоғозлари Марказий депозитарийда ҳисобга олинади.

28. Рақобат бор соҳаларда бюджетдан молиялаштирилмайдиган янги давлат муассасаларини очиш чекланади.

29. 3 октябрдан Тошкент вилоятида ичимлик суви қимматлайди. Аксар ҳудудларда 1 куб сув 2912 сўмдан 3472 сўмга чиқади.