Аҳолини рўйхатга олиш учун 150 миллиард сўм ажратилди

Мазкур босқич доирасида 17 кун давомида фуқаролар census.stat.uz расмий веб-сайти орқали OneID тизими ёрдамида онлайн рўйхатдан ўтишлари мумкин.

Онлайн рўйхатдан ўтиш жараёни Ўзбекистон Республикаси фуқаролари, шунингдек, хорижда вақтинча бўлиб турган ватандошларимиз учун ҳам мавжуд бўлиб, улар исталган жойда ягона идентификация тизими орқали рўйхатдан ўтиш имкониятига эга.

Аҳолини рўйхатга олиш жараёни уч босқичда амалга оширилади. Дастлабки босқичда, яъни 15–31 январь кунлари аҳолига интернет орқали маълумотларни мустақил равишда киритиш имконияти яратилади. Бунинг учун фуқаролар census.stat.uz портали орқали OneID тизими ёрдамида рўйхатдан ўтиб, ўзи ва оила аъзолари ҳақидаги саволномани тўлдириши мумкин бўлади.

Кейинги бир ой давомида эса «маҳалла еттилиги» аъзолари иштирокида уйма-уй юриш орқали аҳолидан маълумотлар йиғилади. Бунда аҳолидан ҳеч қандай SMS-код ёки пул талаб қилинмайди.

Аҳолини рўйхатга олиш қандай мақсадларда ўтказилади?

• Демографик маълумотлар: аҳоли сони, таркиби, ёши, жинси, оилавий ҳолати, таълим даражаси каби маълумотларни тўплаш.
• Ижтимоий-иқтисодий режалаштириш: шаҳарларни ривожлантириш, меҳнат ресурсларидан самарали фойдаланиш ҳамда аҳолига ёрдам кўрсатиш дастурларини ишлаб чиқиш.
• Соғлиқни сақлаш ва ижтимоий ҳимоя: аҳоли саломатлигини мустаҳкамлаш, ногиронлар ва оилаларни қўллаб-қувватлаш бўйича чора-тадбирлар ишлаб чиқиш.
• Прогнозлар яратиш: келажакда аҳоли сони ва таркибидаги ўзгаришларни башорат қилиш.

Статистика қўмитаси маълум қилишича, аҳолини рўйхатга олиш тадбирлари учун давлат бюджети ҳисобидан 140–150 миллиард сўм атрофида маблағ ажратилиши режалаштирилган.

Эслатиб ўтамиз, мазкур чора-тадбирлар доирасида аҳоли охирги марта 1989 йилда рўйхатга олинган.