Ўзбекистон аҳолиси сони 39 миллиондан ошди

Рўйхатга олиш натижаларига кўра, Ўзбекистон аҳолиси сони 39 млн нафардан ошди. Бу ҳақда статистика қўмитаси хабар берди.

Aҳоли ва қишлоқ хўжалигини рўйхатга олиш тадбирининг дастлабки натижаларига бағишланган матбуот анжуманида маълум қилинишича, рўйхатга олишнинг дастлабки натижаларига кўра, Ўзбекистон аҳолиси сони 39 047 321 нафарни ташкил этди.

Жорий статистик ҳисоб-китоблар бўйича ушбу кўрсаткич 38 236 704 нафар эди. Фарқ 810,6 минг нафарни ташкил қилди.

Шунингдек, аҳоли сони 1989 йилдаги рўйхатга олиш натижаларига нисбатан 2 баробарга ошгани маълум қилинди.

Рўйхатга олинган хорижий фуқаролар сони

Ўзбекистон ҳудудида 1 йилдан ортиқ муддат истиқомат қилаётган 56 860 нафар хорижий фуқаро рўйхатга олинган.

Шундан 19 300 нафари Тошкент шаҳрида истиқомат қилмоқда.

Рўйхатга олинган хорижий фуқаролар давлатлар кесимида:

• Ҳиндистон — 13 312 нафар;
  
  Россия Федерацияси — 10 826 нафар;
  
  Қозоғистон — 9 425 нафар;
  
  Тожикистон — 5 722 нафар;
  
  Туркманистон — 5 347 нафар;
  
  Қирғизистон — 4 397 нафар;
  
  Покистон — 1 433 нафар;
  
  Хитой — 1 031 нафар;
  
  Туркия — 811 нафар;
  
  Корея Республикаси — 691 нафар;
  
  Бошқа давлатлар — 3 865 нафар.

Рўйхатга олишда аҳолининг 97,3 фоизи қамраб олинди.

Аҳолининг 2,7 фоизи эса турли сабабларга кўра рўйхатга олиш жараёнларида иштирок этмаган.

Бир нафар аҳолини рўйхатга олиш харажати

Дастлабки ҳисоб-китобларга кўра, бир нафар аҳолини рўйхатга олиш учун сарфланган харажат 0,12 АҚШ долларини ташкил этган.