Aholini roʻyxatga olish uchun 150 milliard soʻm ajratildi

Mazkur bosqich doirasida 17 kun davomida fuqarolar census.stat.uz rasmiy veb-sayti orqali OneID tizimi yordamida onlayn roʻyxatdan oʻtishlari mumkin.

Onlayn roʻyxatdan oʻtish jarayoni Oʻzbekiston Respublikasi fuqarolari, shuningdek, xorijda vaqtincha boʻlib turgan vatandoshlarimiz uchun ham mavjud boʻlib, ular istalgan joyda yagona identifikatsiya tizimi orqali roʻyxatdan oʻtish imkoniyatiga ega.

Aholini roʻyxatga olish jarayoni uch bosqichda amalga oshiriladi. Dastlabki bosqichda, yaʼni 15–31 yanvar kunlari aholiga internet orqali maʼlumotlarni mustaqil ravishda kiritish imkoniyati yaratiladi. Buning uchun fuqarolar census.stat.uz portali orqali OneID tizimi yordamida roʻyxatdan oʻtib, oʻzi va oila aʼzolari haqidagi savolnomani toʻldirishi mumkin boʻladi.

Keyingi bir oy davomida esa «mahalla yettiligi» aʼzolari ishtirokida uyma-uy yurish orqali aholidan maʼlumotlar yigʻiladi. Bunda aholidan hech qanday SMS-kod yoki pul talab qilinmaydi.

Aholini roʻyxatga olish qanday maqsadlarda oʻtkaziladi?

• Demografik maʼlumotlar: aholi soni, tarkibi, yoshi, jinsi, oilaviy holati, taʼlim darajasi kabi maʼlumotlarni toʻplash.
• Ijtimoiy-iqtisodiy rejalashtirish: shaharlarni rivojlantirish, mehnat resurslaridan samarali foydalanish hamda aholiga yordam koʻrsatish dasturlarini ishlab chiqish.
• Sogʻliqni saqlash va ijtimoiy himoya: aholi salomatligini mustahkamlash, nogironlar va oilalarni qoʻllab-quvvatlash boʻyicha chora-tadbirlar ishlab chiqish.
• Prognozlar yaratish: kelajakda aholi soni va tarkibidagi oʻzgarishlarni bashorat qilish.

Statistika qoʻmitasi maʼlum qilishicha, aholini roʻyxatga olish tadbirlari uchun davlat byudjeti hisobidan 140–150 milliard soʻm atrofida mablagʻ ajratilishi rejalashtirilgan.

Eslatib oʻtamiz, mazkur chora-tadbirlar doirasida aholi oxirgi marta 1989 yilda roʻyxatga olingan.