“ANOR BANK” жаримага тортилди

Рақобат қўмитаси томонидан Тошкент вилоятида истиқомат қилувчи фуқаронинг мурожаати асосида “ANOR BANK” AJ томонидан Instagram ижтимоий тармоғида жойлаштирилган реклама ахбороти ўрганилди.

Мурожаатчи банк томонидан акция доирасида эълон қилинган хабарларда акция шартлари тўғрисида тўлиқ маълумотлар берилмаганлигига эътироз билдирган. 

Ўрганишларда рекламада муҳим жиҳатлар — акциянинг амал қилиш шартлари, унга қўлланилган лимит ҳамда лимитдан ошган ҳолларда комиссия тўғрисидаги маълумотлар мавжуд эмаслиги аниқланди. 

Юқоридаги ҳолатлар юзасидан Қўмита Махсус комиссияси томонидан “Реклама тўғрисида”ги Қонунга мувофиқ “ANOR BANK” AJга нисбатан иш қўзғатилиб, ишни кўриб чиқиш якунлари бўйича молиявий жарима қўлланилди. 

Шунингдек, қонунбузилиш ҳолатини бартараф этиш ҳамда келгусида бундай ҳолатларга йўл қўймаслик юзасидан бажарилиши мажбурий бўлган кўрсатма берилди.