Қарийб 10 млрд сўмлик давлат харидларида қонунбузилишлар аниқланди

Қонунбузилишлар мониторинг давомида аниқланган

Қайд этилишича, қоидабузарликлар қўмитанинг ҳудудий органлари томонидан давлат харидлари соҳасида ўтказилган мониторинг ҳамда келиб тушган мурожаатларни ўрганиш натижасида аниқланган.

Жумладан, Андижон вилоятидаги Олтинкўл тумани ҳокимлиги Ободонлаштириш бошқармасининг 300 млн сўмлик давлат харидларида қонунбузилишлар қайд этилган.

Фарғона вилоятида «Фарғона туман йўллардан фойдаланиш» давлат муассасасининг жами 2,5 млрд сўмдан ортиқ қийматга эга 7 та давлат харидида қоидабузарликлар аниқланган.

Жиззах вилоятидаги Зарбдор тумани 2-сонли заиф эшитувчи болалар учун ихтисослаштирилган мактаб-интернатининг умумий қиймати 1,4 млрд сўмдан ортиқ бўлган 2 та давлат хариди ҳам қонун талабларига зид равишда амалга оширилгани қайд этилган.

Шунингдек, Наманган вилоятидаги Чуст туман тиббиёт бирлашмасининг қарийб 1,8 млрд сўмлик давлат харидларида ҳам қоидабузарликлар аниқланган.

Навоий вилоятида Хатирчи давлат ўрмон хўжалигининг 7 та, умумий қиймати қарийб 1,7 млрд сўмлик давлат харидлари бўйича қонунбузилишлар қайд этилган.

Самарқанд вилоятида эса «Ўзйўлкўприк кластери»нинг Самарқанд филиалида 1,7 млрд сўмлик ҳамда «Озодлик» давлат муассасасида 410 млн сўмлик давлат харидлари жараёнида қонун талаблари бузилгани аниқланган.

Қонуннинг қайси талаби бузилган?

Қўмита маълумотига кўра, энг яхши таклифларни танлаш ва тендер савдоларини ўрганиш жараёнида «Рақобат тўғрисида»ги қонуннинг 29-моддаси талабларига риоя этилмаган.

Ушбу модда савдоларда рақобатни чеклашга қарши талабларни белгилайди. Хусусан, савдоларда рақобатни чеклайдиган ёки чеклашга олиб келиши мумкин бўлган ҳаракатларга йўл қўйилгани аниқланган.

Буюртмачи ташкилотларга қандай чоралар кўрилди?

Маълум қилинишича, аниқланган ҳолатлар юзасидан қўмитанинг ҳудудий бошқармалари махсус комиссиялари томонидан буюртмачи ташкилотларга нисбатан ишлар қўзғатилиб, тегишли таъсир чоралари қўлланган.

Қонунбузилишларни бартараф этиш, айрим ҳолатларда молиявий жарималар қўллаш ҳамда ҳуқуқий баҳо бериш учун материалларни тегишли органларга юбориш чоралари кўрилган.

Келгусида шунга ўхшаш ҳолатларнинг олдини олиш мақсадида ташкилотларга бажарилиши мажбурий бўлган кўрсатмалар ҳам берилган.

Муаллиф: Ҳасанбой ОЧУН