“Чорсу” метро бекати нега сув остида қолди? Ҳокимлик изоҳ берди

Ҳокимликка кўра, ҳолатнинг асосий сабаби суғориш тармоқларининг ўзбошимчалик билан тўсиб қўйилганидир:

“Фавқулодда ҳолатнинг асосий сабаби суғориш тармоқларининг ўзбошимчалик билан тўсиб қўйилиши бўлиб, бу сувнинг нормал оқиб кетишига тўсқинлик қилди.”

Маълум қилинишича, автотураргоҳлар, гаражлар ва бошқа ноқонуний қурилишлар аввал самарали ишлаган дренаж тизимига жиддий таъсир кўрсатган.

Шаҳар дренаж тизими кунига 20 мм ёғингарчиликка мўлжалланган бўлса-да, суғориш тармоқлари ёпилгани сабабли ҳатто нисбатан кам ёмғир ҳам сув тошқинига олиб келган.

Айни пайтда ҳудудда таъмирлаш ишлари олиб борилмоқда. Келгусида бундай ҳолатларнинг олдини олиш мақсадида янги дренаж тизими ишлаб чиқилган бўлиб, у кунига 36 мм гача ёғингарчиликни қабул қилиш имконига эга бўлади.