Фуқаролар энди мурожаатларини ўзлари назорат қилади

Президент Халқ қабулхонаси Рақамли технологиялар вазирлиги билан ҳамкорликда мурожаатлар бўйича қайта алоқа — SMS-хабарнома юбориш хизматини ишга туширди.

Янги тизим давлат раҳбарининг топшириғи асосида йўлга қўйилган бўлиб, мурожаатлар билан ишлаш сифатини оширишга қаратилган.

Мурожаатнинг ҳар бир босқичи ҳақида хабар берилади

Энди фуқаролар ўз мурожаатларининг кўриб чиқилиши жараёни ҳақида маълумотни pm.gov.uz сайтидаги шахсий кабинети ва SMS-хабарнома орқали олиб боради.

SMS-хабарномада мурожаатга оид махсус ҳавола бўлади. Фуқаро ушбу ҳавола орқали кириб, мурожаат юзасидан берилган жавоб билан танишиши мумкин.

Шунингдек, фуқарога жавоб бўйича ўз муносабатини билдириш имконияти ҳам берилади.

Фуқаро жавобдан норози бўлса, қайта кўриб чиқишни сўраши мумкин

Фуқаро берилган жавобдан рози бўлса, «Розиман» тугмасини босиши мумкин.

Агар жавобдан норози бўлса, «Эътирозим бор» вариантини танлаб, мурожаатни қайта ижрога қайтариши мумкин.

Шу тариқа фуқаро ўз мурожаатининг кўриб чиқилиши жараёнини мустақил равишда кузатиш ва берилган жавобга муносабат билдириш имкониятига эга бўлади.

Янги хизмат мурожаатларни кўриб чиқиш жараёнида очиқлик ва қайта алоқани кучайтиришга ҳамда фуқароларнинг ўз мурожаатлари бўйича назоратини оширишга хизмат қилиши кутилмоқда.