Хитойда чиқарилган болалар ўйинчоқлари хавфли деб топилди

Жиззах шаҳридаги савдо нуқталаридан бирида ўтказилган назорат харидлари давомида Хитойда ишлаб чиқарилган айрим болалар ўйинчоқларида хавфсизлик талабларига номувофиқликлар аниқланди. 

Мутахассислар томонидан “Эластик спираль ипли тўп”, “Pinch” савдо белгили мушук панжаси ва “Avengers superhero” ўйинчоқларидан намуналар олиниб, лаборатория синовлари ўтказилди. 

Синов натижаларига кўра:

• маҳсулотларда ўткир ҳид мавжудлиги;
• ҳимоя қопламасининг намлик таъсирига чидамсизлиги;
• майда деталларнинг мустаҳкам бириктирилмагани;
• механик таъсирга бардош бермаслиги;
• формальдегид миқдори меъёрлардан юқорилиги аниқланган.

Таъкидланишича, формальдегид нафас йўллари, кўз ва терига салбий таъсир кўрсатиши, аллергик реакцияларни кучайтириши ҳамда болалар саломатлиги учун хавф туғдиради. 

Шунингдек, ўйинчоқлардаги майда қисмларнинг осонгина ажралиши болаларнинг уларни ютиб юбориши ёки жароҳатланишига сабаб бўлиши мумкин. 

Текширув давомида маҳсулот ёрлиқларида зарур маълумотлар давлат тилида кўрсатилмагани ҳам қайд этилди.

 Аниқланган ҳолатлар “Болалар ўйинчоқларининг хавфсизлиги тўғрисидаги умумий техник регламенти” талабларига зид деб топилди. Камчиликлар юзасидан савдо субъектларига огоҳлантириш хатлари юборилди ҳамда ушбу маҳсулотларни савдодан чиқариш ва реализациясини тўхтатиш бўйича чоралар кўрилди.

Халқаро меъёрлар, жумладан, Халқаро стандартлаштириш ташкилоти томонидан ишлаб чиқилган меъёрлар ва Европа Иттифоқида қўлланиладиган хавфсизлик талабларига кўра, ўйинчоқлар таркибида хавфли даражадаги заҳарли моддалар бўлмаслиги, оддий фойдаланишга чидамли бўлиши ҳамда бўғилиш, заҳарланиш ёки шикастланиш каби хатарларни камайтирадиган тарзда ишлаб чиқарилиши керак.