Нега Тошкент бош режаси харитасининг янги талқини саволлардан кўра кўпроқ хавотир уйғотмоқда?

Бироқ бу янгилик жамоатчилик орасида кўплаб саволларни келтириб чиқарди. Асосий эътироз — зоналарнинг аниқ чегараланмагани. Ҳудудлар алоҳида бинолар бўйича эмас, балки бутун бошли маҳаллалар кесимида белгилангани кўпчиликни ҳайрон қолдирди. Масалан, агар маҳаллада атиги бир неча эски икки қаватли уйларни бузиш режалаштирилган бўлса ҳам, бутун маҳалла “реновация зонаси”га киритилган. Бу эса аҳолида савол туғдиряпти: бу ерда фақат нуқтавий қурилиш режалаштирилганми ёки кенг кўламли бузилишлар кутилмоқда?

Алоҳида хавотир уйғотаётган ҳолатлардан бири — реконструкция зонасига фақат эскирган, 40 йилдан ортиқ аввал қурилган уйлар эмас, балки нисбатан янги кўп қаватли бинолар, шу жумладан, "Tashkent City" ҳудудидаги турар-жой мажмуаларининг ҳам киритилганидир. Ижтимоий тармоқ фойдаланувчилари ҳақли равишда сўрашмоқда: реконструкция учун объектлар қандай мезонларга кўра танлаб олинмоқда?

Шунингдек, интерактив хаританинг ўзи ҳам танқидга учради. Фойдаланувчилар унинг мураккаблиги, етарлича тушунарли эмаслиги ва секин ишлаши ҳақида шикоят қилишмоқда. Очиқлик кутилган эди, бироқ аксинча, бу янгилик аҳолида янги хавотир тўлқинини уйғотди.

Харитага кўра, реновация зоналарига асосан эски уй-массивлардаги кам қаватли кўп хонадонли уйларнинг киргани кўринади. Ижтимоий тармоқларда қуйидаги каби изоҳлар пайдо бўлди:

"Яқинда уйимга таъмир қилиб, кўчиб ўтдим. Энди қарасам, уйимиз устидан қизил чизиқ ўтган — бу консервация зонаси эмиш. Афтидан, бу ерга йўл қуриладиган кўринади. Энди нима қиламиз? Кадастр ҳужжати бериладими? Рўйхатга туриш мумкинми? Снос эртагами ёки 20 йилдан кейин бўладими? Бундай ноаниқ шароитда таъмир қилишнинг нима фойдаси бор?".

Аҳоли норозилигининг кучайиши ортидан харита жойлашган сайтга кириш вақтинча тўхтади. Буни атайлаб блокланган деган миш-мишлар тарқалди. Бироқ Қурилиш вазирлиги расмий баёнотида бу ҳолатни рад этди: уларнинг айтишича, сайтдаги узилишлар фойдаланувчилар сонининг кескин ортиши туфайли юзага келган техник носозликлар билан боғлиқ.