Оғир ақлий заифлиги бор шахсларга қараётганлар учун ойлик нафақа жорий этилади

Президент Шавкат Мирзиёев томонидан маъқулланган таклифларга кўра, 2026 йил 1 сентябрдан бошлаб оғир ақлий заифлик ташхиси қўйилган, 18 ёшдан катта шахсларга қараётган қонуний вакиллар учун ойлик парвариш нафақаси белгиланади.

Янги ижтимоий хизматлар жорий этилади

Шунингдек, 2026 йил давомида I ва II гуруҳ ногиронлиги бўлган ҳамда руҳий касалликларга эга шахслар учун қатор янги ижтимоий хизматлар йўлга қўйилади. Улар қуйидагиларни ўз ичига олади:

• кундузги парвариш хизмати «Янги кун»;
• уйда парвариш хизмати;
• кичик уйлар шаклида қўллаб-қувватлаш («Мадад»);
• қисқа муддатли жойлаштириш («Ижтимоий таътил»).

Мазкур хизматлар оилаларни қўллаб-қувватлаш, кундалик ҳаёт кўникмаларини шакллантириш, маиший ишларга ўргатиш ҳамда касбий ва молиявий қобилиятларни ривожлантиришга қаратилган.

Давлат-хусусий шериклик асосида хизматлар

Янги хизматлар давлат-хусусий шериклик асосида, тегишли тажриба ва талабларга жавоб берадиган нодавлат ташкилотлар томонидан кўрсатилади. Ушбу хизматлардан фойдаланиш харажатлари эса Давлат ижтимоий ҳимоя жамғармаси маблағлари ҳисобидан субсидиялар орқали қопланади.