Ўзбекистонда эркаклар сони аёлларга нисбатан ҳануз юқори

Бу ҳақда Миллий статистика қўмитаси маълум қилди.

Маълумотларга кўра, мамлакат аҳолисининг 50,4 фоизини эркаклар, 49,6 фоизини эса аёллар ташкил этмоқда. Ўртача ҳисобда ҳар 1000 нафар аёлга 1015 нафар эркак тўғри келади.

Ҳудудлар кесимида энг катта фарқ Наманган вилоятида кузатилган. У ерда ҳар 1000 нафар аёлга 1034 нафар эркак тўғри келади.

Шунингдек, юқори кўрсаткичлар қуйидаги ҳудудларда қайд этилган:

• Қашқадарё вилояти — 1029;
• Андижон вилояти — 1027;
• Навоий вилояти — 1026;
• Сурхондарё вилояти — 1025;
• Жиззах ва Фарғона вилоятлари — 1019;
• Самарқанд вилояти — 1016.

Қорақалпоғистон Республикасида бу кўрсаткич 1010 нафарни ташкил этган. Сирдарё вилоятида — 1009, Тошкент вилоятида — 1008, Бухоро вилоятида — 1006, Хоразм вилоятида эса — 1004 нафар эркак ҳар 1000 нафар аёлга тўғри келмоқда.

Маълум қилинишича, аёллар сони эркаклардан кўпроқ бўлган ягона ҳудуд Тошкент шаҳри ҳисобланади. Пойтахтда ҳар 1000 нафар аёлга 966 нафар эркак тўғри келади.