Қурилиш ташкилотларига атмосфера ҳавосини муҳофаза қилиш бўйича қатъий огоҳлантириш берилди

Экология ва иқлим ўзгариши миллий қўмитаси барча қурилиш ташкилотларига қурилиш майдонларида атмосфера ҳавосини муҳофаза қилиш бўйича белгиланган талабларга қатъий риоя қилиш зарурлигини билдирган огоҳлантирувчи хат юборди.

21 ноябр куни йўлланган хатга кўра, президент қарорига мувофиқ, майдони 500 квадрат метрдан ошиб кетадиган қурилиш майдонларидан махсус автотранспорт воситаларини ювмасдан йўлларга чиқариш тақиқланади. Шунингдек, чанг ҳосил бўлиши ва тарқалишини олдини олиш учун қуйидаги чора-тадбирлар мажбурий ҳисобланади:

– Қурилиш жараёнида чанг ва қум заррачаларининг ҳавога кўтарилишига йўл қўймаслик;
– Қурилиш майдонига кириш йўлакларида сув пуркагичлар ва осма ёмғирлатгичларни ўрнатиш;
– Автотранспорт воситалари ғилдиракларини ювиш учун махсус ювиш шохобчаларини ташкил этиш;
– Қурилиш майдонини ҳимоя тўсиқлари, махсус қопламалар ва материаллар билан жиҳозлаш.

Талаблар бажарилмаса, қонунчиликка мувофиқ қуйидаги чоралар қўлланилади:

– Фаолиятни 10 иш кунигача тўхтатиб туриш ёки белгиланган тартибда тўхтатиш;
– Маъмурий жавобгарлик (қонунбузарлик, табиий муҳитга зарар етказиш, инспекторнинг қонуний фаолиятига тўсқинлик қилиш);
– Атмосфера ҳавоси ифлосланиши билан боғлиқ зарар ҳолатларида жиноят жавобгарлиги.

Миллий қўмита қурилиш ташкилотларини барча талабларни сўзсиз бажаришга чақирмоқда.