Qurilish tashkilotlariga atmosfera havosini muhofaza qilish boʻyicha qatʼiy ogohlantirish berildi

Ekologiya va iqlim oʻzgarishi milliy qoʻmitasi barcha qurilish tashkilotlariga qurilish maydonlarida atmosfera havosini muhofaza qilish boʻyicha belgilangan talablarga qatʼiy rioya qilish zarurligini bildirgan ogohlantiruvchi xat yubordi.

21 noyabr kuni yoʻllangan xatga koʻra, prezident qaroriga muvofiq, maydoni 500 kvadrat metrdan oshib ketadigan qurilish maydonlaridan maxsus avtotransport vositalarini yuvmasdan yoʻllarga chiqarish taqiqlanadi. Shuningdek, chang hosil boʻlishi va tarqalishini oldini olish uchun quyidagi chora-tadbirlar majburiy hisoblanadi:

– Qurilish jarayonida chang va qum zarrachalarining havoga koʻtarilishiga yoʻl qoʻymaslik;
– Qurilish maydoniga kirish yoʻlaklarida suv purkagichlar va osma yomgʻirlatgichlarni oʻrnatish;
– Avtotransport vositalari gʻildiraklarini yuvish uchun maxsus yuvish shoxobchalarini tashkil etish;
– Qurilish maydonini himoya toʻsiqlari, maxsus qoplamalar va materiallar bilan jihozlash.

Talablar bajarilmasa, qonunchilikka muvofiq quyidagi choralar qoʻllaniladi:

– Faoliyatni 10 ish kunigacha toʻxtatib turish yoki belgilangan tartibda toʻxtatish;
– Maʼmuriy javobgarlik (qonunbuzarlik, tabiiy muhitga zarar yetkazish, inspektorning qonuniy faoliyatiga toʻsqinlik qilish);
– Atmosfera havosi ifloslanishi bilan bogʻliq zarar holatlarida jinoyat javobgarligi.

Milliy qoʻmita qurilish tashkilotlarini barcha talablarni soʻzsiz bajarishga chaqirmoqda.