Ўзбекистонда навбатдаги “Автомобилсиз кун” ўтказилмоқда

10 июль куни Ўзбекистоннинг барча ҳудудларида навбатдаги “Автомобилсиз кун” акцияси бўлиб ўтмоқда.

Мазкур ташаббус Президентнинг 2026 йил 25 мартдаги “Атмосфера ҳавоси сифатини яхшилашга қаратилган “Тоза ҳаво” умуммиллий лойиҳасини амалга ошириш чора-тадбирлари тўғрисида”ги фармони асосида ўтказилмоқда. Унга мувофиқ, ҳар ойнинг 10 ва 25 саналарида “Автомобилсиз кун” ҳамда “Автомобилсиз ҳафта” акциялари ташкил этилади.

Экология миллий қўмитаси маълумотига кўра, акциялар доирасида қўмита ва унинг ҳудудий бошқармалари ходимлари хизмат ва шахсий автомобилларидан воз кечиб, жамоат транспорти ҳамда велосипедлардан фойдаланмоқда.

Натижада акция бошланганидан буён 1730 дан ортиқ хизмат ва шахсий автотранспорт воситасидан фойдаланиш чекланган. Бу эса атмосферага чиқариладиган зарарли ташламалар ҳажмини 17 370 килограммга қисқартиришга хизмат қилган. Шунингдек, шаҳарлардаги тирбандликлар ҳам камайгани қайд этилмоқда.

Экология миллий қўмитаси эслатишича, “Автомобилсиз кун” ва “Автомобилсиз ҳафта” акциялари давомида давлат фуқаролик хизматчилари томонидан автотранспорт воситаларидан фойдаланиш жавобгарликка сабаб бўлади.

Қўмита давлат ва нодавлат ташкилотлари ҳамда барча фуқароларни акцияда фаол иштирок этишга, жамоат транспорти, электромобиллар ва бошқа экологик тоза транспорт воситаларидан кенгроқ фойдаланишга чақирди.