«Rayxon oilaviy milliy taomlari» таъсисчиси Одилхон қори қамоққа олинди

Бу ҳақда Олий суд матбуот хизмати маълум қилди.

Маълум қилинишича, 1977 йилда Наманган вилоятида туғилган Одилхон Исмоилов ҳамда яна 6 нафар шахсга нисбатан Жиноят кодексининг бир қатор моддалари бўйича айблов эълон қилинган. Жумладан:

• 167-модда — Ўзлаштириш ёки растрата йўли билан талон-торож қилиш;
• 179-модда — Сохта тадбиркорлик;
• 184-модда — Солиқлар ёки йиғимларни тўлашдан бўйин товлаш;
• 189-модда — Савдо ёки хизмат кўрсатиш қоидаларини бузиш;
• 28, 209-моддалар — Мансаб сохтакорлигида иштирок этиш;
• 209-модда — Мансаб сохтакорлиги;
• 227-модда — Ҳужжатлар, штамплар, муҳрлар, бланкалар ҳамда автотранспорт воситалари давлат рақам белгиларини эгаллаш, йўқ қилиш, уларга шикаст етказиш ёки яшириш;
• 228-модда — Ҳужжатлар, штамплар, муҳрлар, бланкаларни тайёрлаш, қалбакилаштириш, сотиш ёки улардан фойдаланиш.

Мазкур жиноят иши айни пайтда жиноят ишлари бўйича Поп туман судида очиқ суд мажлисида кўриб чиқилмоқда.

Суд жараёни доирасида Одилхон Исмоилов ва яна 4 нафар шахсга нисбатан «қамоққа олиш», 1 нафар шахсга нисбатан эса «гаров» тарзидаги эҳтиёт чораси қўлланилган.

Суд якуни бўйича қўшимча маълумот берилади.