Сиэтл 1 сентябрни “Ўзбекистон Мустақиллиги куни” деб эълон қилди

Бу ҳақда Ўзбекистоннинг Вашингтондаги бош консули Аҳрор Бурҳонов маълум қилди.

Қарор Сиэтл мэри томонидан имзоланган махсус прокламацияда қайд этилган. Ҳужжатда Ўзбекистоннинг мустақиллик йилларида суверенитет, тараққиёт ва кенг кўламли ўзгаришлар йўлидан ўтгани таъкидланган.

Ўзбекистоннинг халқаро аҳамиятига урғу берилди

Прокламацияда Ўзбекистон Марказий Осиёдаги энг кўп аҳолига эга давлат ва минтақанинг жадал ривожланаётган иқтисодиётларидан бири сифатида қайд этилган.

Шунингдек, мамлакатнинг очиқ бозорлар ва халқаро ҳамкорликни кенгайтиришга интилаётгани таъкидланган.

Ҳужжатда Ўзбекистоннинг қадимий Ипак йўли марказида жойлашгани ҳам алоҳида қайд этилиб, мамлакат 100 миллиондан ортиқ истеъмолчига эга минтақа учун стратегик дарвоза сифатида баҳоланган. Бу ҳолат савдо, инвестиция, логистика, технология ва энергетика соҳаларида Сиэтл бизнес ҳамжамияти билан ҳамкорлик қилиш учун имкониятлар яратиши таъкидланган.

Сиэтлда Ўзбекистон Бош консулхонаси фаолият юритмоқда

Прокламацияда Ўзбекистоннинг Сиэтлда Бош консулхонаси фаолиятини йўлга қўйгани ҳам қайд этилган.

Мазкур дипломатик ваколатхона Ўзбекистон ва АҚШнинг Тинч океани шимоли-ғарбий ҳудуди ўртасида инсонлараро, бизнес ва ҳукуматлараро алоқаларни мустаҳкамлашга хизмат қилиши таъкидланган.

Ўзбекистоннинг Сиэтлдаги Бош консулхонасининг расмий очилиш маросими 4 сентябрь куни ўтказилиши режалаштирилган. Унда Вашингтон штати ва Сиэтл шаҳри раҳбарлари, дипломатик корпус, АҚШ компаниялари, академик доиралар ва жамоатчилик вакиллари иштирок этиши кутилмоқда.

Ўзбекистон мустақиллигининг 35 йиллиги

Ўзбекистон 2026 йилда давлат мустақиллигининг 35 йиллигини нишонламоқда. Мамлакатда 1 сентябрь Мустақиллик куни сифатида нишонланади.

Сиэтл шаҳрининг қарори Ўзбекистоннинг АҚШдаги дипломатик ва иқтисодий алоқалари, хусусан, мамлакатнинг Ғарбий соҳилдаги ҳамкорлиги кенгайиб бораётгани фонида қабул қилинди.