Татаристонда ҳалок бўлган 8 нафар ўзбекистонликнинг жасади олиб келинди

Ўзбекистон Ташқи ишлар вазирлиги маълум қилишича, марҳумларни олиб келиш учун махсус авиарейс ташкил этилган ва самолёт 12 август куни Ўзбекистонга қўнган.

Ҳалок бўлган фуқароларнинг барчаси Нижнекамскдаги корхоналардан бирида қурилиш ишларида меҳнат қилган.

Президент Шавкат Мирзиёев топшириғи билан ҳодиса оқибатларини бартараф этиш ва жабрланган фуқароларга ёрдам кўрсатиш бўйича Ҳукумат комиссияси тузилган. Унинг таркибига Ташқи ишлар, Фавқулодда вазиятлар, Ички ишлар, Соғлиқни сақлаш вазирликлари ҳамда Миграция агентлиги вакиллари киритилган.

Ўзбекистоннинг Россиядаги элчиси Ботиржон Асадов ва Ўзбекистоннинг Қозондаги бош консули Нодирбек Қосимов воқеа жойига бориб, маҳаллий мутасаддилар билан учрашган. Ҳодисада жароҳатланган Ўзбекистон фуқаролари шифохоналарга ётқизилган ва уларга зарур тиббий ёрдам кўрсатилмоқда.

Ташқи ишлар вазирлигига кўра, марҳумларни ватанга қайтариш ҳамда уларнинг оилаларини қўллаб-қувватлаш масалалари Россия томони билан ҳамкорликда назоратга олинган.

10 август куни эрталаб Нижнекамск шаҳрига дронлар орқали оммавий ҳужум уюштирилган. Маълумотларга кўра, ҳодиса оқибатида жами 13 киши, жумладан, 5 ёшли бола ҳалок бўлган. Яна 75 киши тиббий ёрдам сўраб мурожаат қилган.

Ҳалок бўлганлар орасида 8 нафар Ўзбекистон фуқароси ва бир нафар Тожикистон фуқароси бор. Татаристон раҳбари Рустам Минниханов Ўзбекистон ва Тожикистон президентларига ҳамдардлик билдирган.

Марҳумларни ватанга жўнатишдан олдин Нижнекамскдаги масжидда уларнинг руҳига бағишлаб жамоавий дуо ўқилган.