Нижнекамскдаги ҳодиса: ўзбекистонликлар дрон ҳужумига учради

10 август куни тонгда Нижнекамск шаҳридаги қатор объектларга дронлар орқали ҳужум қилингани хабар қилинган. Дастлабки маълумотларга кўра, ҳодиса оқибатида қурилиш корхонасида ишлаган 8 нафар Ўзбекистон фуқароси ҳалок бўлган, бир неча фуқаро эса турли даражадаги тан жароҳатлари билан шифохонага жойлаштирилган.

Президент топшириғи асосида ташкил этилган Ҳукумат комиссиясига:

• жабрланган фуқаролар ҳолидан хабар олиш ва уларга зарур ёрдам кўрсатиш;
• ҳалок бўлган фуқароларни махсус авиарейс орқали Ўзбекистонга олиб келиш;
• марҳумларни тегишли манзилларга етказиш;
• уларнинг оила аъзоларига ҳар томонлама кўмаклашиш вазифалари юклатилган.

Шунингдек, Фавқулодда вазиятлар, Ташқи ишлар, Соғлиқни сақлаш вазирликлари, Миграция агентлиги ва бошқа мутасадди ташкилотлар вакилларидан иборат махсус ишчи гуруҳ Россияга юборилган.

Ўзбекистоннинг Қозон шаҳридаги Бош консулхонаси ва Миграция агентлиги вакиллари ҳодиса жойига етиб бориб, россиялик ҳамкасблари билан ҳамкорликда зарур чораларни кўрмоқда.

Воқеа бўйича расмий маълумотлар янгиланиши билан қўшимча тафсилотлар эълон қилинади.