Тиббиёт клиникалари устидан назорат кучайтирилади

Президентнинг “Соғлиқни сақлаш соҳасида кўрсатилаётган хизматлар сифатини ошириш бўйича қўшимча чора-тадбирлар тўғрисида”ги қарорига кўра, 2030 йилга қадар 3 мингдан ортиқ давлат тиббиёт муассасаси лицензия талабларига мослаштирилади.

Ягона стандарт ва лицензиялаш

Янги тартибларга кўра, ягона стандартлар ҳам давлат, ҳам хусусий клиникаларга татбиқ этилади.
2026 йил 1 июлдан бошлаб лицензиялаш функциялари Соғлиқни сақлаш вазирлиги ҳузуридаги Лицензиялаш ва аккредитация марказига ўтказилади.

Марказ лицензиялар беради ва талабларга риоя этилишини назорат қилади.

Шунингдек, ҳар бир тиббиёт муассасасида хизматлар сифатини назорат қилувчи алоҳида тузилма бўлиши мажбурий этиб белгиланмоқда.

Рақамлаштириш ва онлайн назорат

2027 йил 1 апрелдан бошлаб барча клиникалар ўз ахборот тизимларини “Рақамли соғлиқни сақлаш” платформасига интеграция қилиши шарт бўлади. Бу орқали хизматлар сифати масофадан туриб назорат қилинади.

Аккредитациясиз хизматларга чеклов

2028 йил 1 апрелдан бошлаб давлат ташкилотларига миллий ёки халқаро аккредитациядан ўтмаган клиникалардан тиббий хизматлар харид қилиш тақиқланади. Жумладан, ISQua каби халқаро стандартлар инобатга олинади.

Муддатлар ва қўшимча чоралар

Давлат клиникаларини мажбурий лицензиялаш босқичма-босқич амалга оширилади:

• республика даражасида — 2027 йил 1 апрелгача;
• минтақавий даражада — 2028 йил охиригача;
• туман ва шаҳар даражасида — 2030 йилгача.

Камида 75 та миллий аккредитация стандартини жорий этиш, назоратни электрон шаклга ўтказиш режалаштирилган.

Шунингдек:

• нодавлат нотижорат ташкилотлари ҳам аккредитация жараёнида иштирок этиши мумкин;
• текширишлар ҳақида Biznes-ombudsman 24 соат ичида хабардор қилинади;
• такрорий текширишларга оид чекловлар бекор қилинади.

Ислоҳотларни амалга ошириш учун 20 млрд сўм ажратилиши, мутахассисларни хорижда ўқитиш ва хорижий экспертларни жалб қилиш режалаштирилган.