Тошкент вилоятида иссиқхоналарни демонтаж қилиш ишлари бошланди

Маълум қилинишича, куз-қиш мавсумида айрим иссиқхоналар кўмир, мазут, эски автомобиль шиналари ва бошқа зарарли ёқилғи турларидан фойдаланган. Бу эса атмосфера ҳавосининг ифлосланишига, аҳоли саломатлиги ва атроф-муҳитга салбий таъсир кўрсатган.

Шу муносабат билан махсус комиссия томонидан ўтказилган рейдлар давомида қонунбузарликларга чек қўйилиб, ҳавони ифлослантирувчи манбалар бартараф этилди.

Президентнинг 2026 йил 25 мартдаги 108-сонли қарори ҳамда Вазирлар Маҳкамасининг 2026 йил 9 апрелдаги 162-сонли қарорига мувофиқ, мазкур иссиқхоналарни сунъий иситиш тизимларидан узиш ва уларни иқлим шароити қулай бўлган ҳудудларга кўчириш ишлари амалга оширилмоқда.

Тадбиркорларга қандай имтиёзлар берилади?

Ҳукумат қарорига кўра, фаолиятини Сурхондарё вилоятининг Шеробод туманидаги «Surxon-Agro» эркин иқтисодий зонасига кўчирадиган тадбиркорларга бир қатор енгилликлар тақдим этилади.

Жумладан:

• иссиқхона хўжаликлари учун олинган кредитларни қайтариш муддати 5 йилгача узайтирилади, шунингдек, 3 йилгача имтиёзли давр берилади;
• аввал берилган давлат кафолатлари ва фоиз компенсациялари сақлаб қолинади;
• 2028 йил 1 апрелга қадар иссиқхонани демонтаж қилиш, ташиш ва қайта ўрнатиш харажатлари учун ҳар бир сотих ер майдонига 500 минг сўмгача бир марталик компенсация тўлаб берилади.

Ҳозирда Тошкент вилоятидаги тадбиркорларга иссиқхоналарни «Surxon-Agro» эркин иқтисодий зонасига кўчириш шартлари ва мавжуд имтиёзлар бўйича тушунтириш ишлари олиб борилмоқда.