Иссиқхоналарни Тошкентдан Сурхондарёга кўчириш бўйича қарор қабул қилинди

Шу мақсадда Сурхондарё вилоятининг Шеробод туманида “Сурхон-Агро” эркин иқтисодий зонаси ташкил этилади.

Қарорга кўра, иссиқхоналарни кўчирган тадбиркорлар учун қатор имтиёзлар жорий этилади. Хусусан, уларга халқаро молия институтлари, мақсадли жамғармалар, Тикланиш ва тараққиёт жамғармаси ҳамда тижорат банклари маблағлари ҳисобидан ажратиладиган кредитлар 3 йилгача имтиёзли давр билан 5 йилгача узайтирилади.

Шунингдек, 2028 йил 1 апрелга қадар иссиқхона конструкциялари ва ускуналарини демонтаж қилиш, ташиш ва қайта ўрнатиш харажатлари компенсация қилинади.

Иссиқхоналар кўчирилиши натижасида бўшаган ер майдонларида интенсив боғдорчилик, узумчилик ва кўчатчиликни ривожлантиришга рухсат берилади.

Бироқ кўчирилмаган иссиқхона хўжаликлари учун янги чекловлар жорий этилади. Жумладан, давлат мулкида бўлган ерларда жойлашган иссиқхоналар фаолияти тўхтатилади ва ушбу ҳудудларда янги қурилишлар тақиқланади.

2026 йил 1 июндан бошлаб кўмир, мазут ва атмосферага зарарли бошқа ёқилғилардан фойдаланувчи янги иссиқхоналарни ташкил этиш тақиқланади.

1 августдан эса амалдаги иссиқхоналар фаолияти қайта кўриб чиқилиб, қуйидаги чекловлар жорий этилади:

• табиий газ етказиб бериш тўлиқ тўхтатилади;
• сув ресурслари учун тарифлар саноат корхоналарига нисбатан 5 бараварга оширилади;
• чиқиндилар учун компенсация тўловлари 20 бараварга кўпайтирилади.

Мазкур чоралар экологияни яхшилаш, ресурслардан самарали фойдаланиш ва қишлоқ хўжалигини ҳудудий жиҳатдан оптималлаштиришга қаратилган.