Ўзбекистонда қайси соҳада энг юқори маош тўланади?

Давлат статистика қўмитаси 2025 йил январь–сентябрь ойлари учун Ўзбекистон иқтисодиёти тармоқлари бўйича ўртача иш ҳақи ҳақидаги маълумотларни эълон қилди.

Ҳисоботга кўра, энг юқори маош банк, суғурта, лизинг, кредит ва воситачилик соҳалари ходимларига тўланмоқда — ўртача ойлик 16,8 миллион сўм.

Иккинчи ўринда — IT ва телекоммуникациялар соҳаси. Бу ерда ишловчиларнинг ўртача ойлик маоши 14,9 миллион сўмни ташкил этмоқда.

Қолган соҳаларда ўртача иш ҳақи қуйидагича:

• транспорт ва сақлаш — 9,3 млн сўм;
• саноат — 7,3 млн сўм;
• савдо — 6,8 млн сўм;
• қурилиш — 6,3 млн сўм;
• санъат, кўнгилочар тадбирлар ва ҳордиқ — 5,1 млн сўм;
• жойлаштириш ва овқатланиш хизматлари — 5,1 млн сўм.

Рейтингнинг энг паст қисмида эса таълим ва соғлиқни сақлаш ходимлари жойлашган. Ўқитувчиларнинг ўртача ойлик маоши 4,1 миллион сўм, шифокорларнинг иш ҳақи эса тахминан 3,7 миллион сўмни ташкил этади.

Шундай қилиб, жамият учун асосий ижтимоий хизматларни кўрсатувчи мутахассислар — ўқитувчи ва шифокорлар мамлакатда энг кам ҳақ тўланадиган тоифа бўлиб қолмоқда.