Инвесторлар Ўзбекистондан нима кутяпти: янги имкониятлар ва ташаббуслар

Президент ҳузурида ўтган тақдимотда асосий эътибор инвестиция киришини енгиллаштириш, замонавий инфратузилма яратиш ва шаффоф қоидаларни таъминлашга қаратилди.

Учта йўналиш устувор деб белгиланди: Тошкент халқаро молия маркази, рақамли технологиялар маркази ва исломий молия тизимини жорий этиш.

Тошкент халқаро молия маркази орқали 2030 йилгача иқтисодиётга 20–25 миллиард доллар жалб қилиш режалаштирилган. Бу марказ ялпи ички маҳсулот ўсишига ҳар йили қўшимча ҳисса қўшиши, 15 минггача юқори малакали иш ўринлари яратиши кутилмоқда.

“Enterprise Uzbekistan” бренди остида ташкил этиладиган Рақамли технологиялар халқаро маркази эса 1000 тагача компанияни жалб қилиш, 300 мингдан зиёд иш ўрни яратиш ва 5 миллиард долларлик экспорт салоҳиятига чиқишни мақсад қилган. Айрим йирик халқаро IT компаниялар бу ташаббусга аллақачон қизиқиш билдирган.

Шу билан бирга, мамлакатда исломий молия хизматларини жорий этиш бошланмоқда. Жорий йилда камида битта тижорат банкида исломий “дарча” очилиши режалаштирилган. 2026–2030 йилларда эса тўлиқ исломий банк фаолиятини амалга оширувчи икки банк ташкил этилади.

Исломий молия доирасида муробаҳа, музораба, вакала, салам, истисно, мушорака ва исломий ижара каби молиявий инструментлар жорий қилинади. Бу эса қўшимча инвестиция ва депозитларни жалб қилиш имкониятини кенгайтиради.

Умуман, ушбу ташаббуслар орқали 2026–2030 йилларда камида 1 миллиард доллар қўшимча молиявий ресурсларни жалб қилиш режалаштирилган.