28 fevral kuni noyob astronomik hodisaga guvoh boʻlamiz

Bu haqda Fanlar akademiyasi maʼlum qildi. Sayyoralar paradi bu noyob astronomik hodisalardan biri boʻlib, bunda 2 va undan ortiq sayyoralar bir toʻgʻri chiziqda yoki bir-biriga yaqin burchak masofada joylashadi. Sayyoralar paradini ikki guruhga boʻlish mumkin. 

Birinchi guruh kichik sayyoralar paradi deb ataladi va unda 4 tagacha sayyoralar qatnashadi. Kichik sayyoralar paradi bir yilda bir marta sodir boʻlishi mumkin.

Ikkinchi guruh esa katta sayyoralar paradi deb ataladi, bunda 5 ta yoki undan ortiq sayyoralar bir-biriga yaqin burchak masofaga kelishadi.

Ushbu hodisa 18-20 yilda bir marta sodir boʻladi. Unda Merkuriy, Venera, Neptun, Saturn, Uran va Yupiter sayyoralari ishtirok etadi.

Bundan tashqari Quyosh tizimidagi 8 ta sayyora ishtirokidagi parad ham boʻlishi mumkin, bu noyob astronomik hodisa 170 yilda bir marta sodir boʻladi.

Ushbu sayyoralar paradida sayyoralar osmon sohasining chorak qismini egallaydi va paradda ishtirok etadigan sayyoralarni osmonning janubiy-gʻarbiy qismidan topishingiz mumkin.

Paradda ishtirok etadigan sayyorlardan faqat 4 tasini oddiy koʻz bilan koʻrish mumkin, xolos. Bular –Merkuriy, Venera, Saturn va Yupiter.

Neptun va Uran sayyoralari esa juda xira boʻlganligi sababli ularni koʻrish uchun maxsus optik uskunalar (teleskop yoki binokl) kerak boʻladi.

Merkuriy va Venera Quyoshga juda yaqin boʻlganligi sababli ular parad vaqtida ufqqa juda yaqin boʻladi, bu esa ularni osmonda koʻrish imkoniyatini kamaytiradi.

Sayyoralar paradi vaqtida sayyoralarning Yer va Quyoshga nisbatan Quyosh tizimidagi vaziyati quyidagi rasmda keltirilgan.

Rasmda Mars sayyorasi Yerdan qaralganda Quyoshdan avval ufqqa botib ketishini tushunish qiyin emas. Shu sababli Mars sayyorasi bu safar paradda ishtirok etmaydi.

Ayrim insonlar bu kabi astronomik hodisalarni yoki boshqa osmon jismlarini inson taqdiri va kelajagi bilan bogʻlashga, turli farazlarga asoslanib bashoratlar qilishga urinadilar. Biroq ilmiy nuqtai nazardan qaraganda, har qanday astronomik hodisa, jumladan, sayyoralar paradi ham inson hayoti, taqdiri yoki kelajagiga hech qanday taʼsir koʻrsatmaydi va ular bilan bogʻliq emas. 

Shu sababli sayyoralar paradini turli taxmin va xurofotlarga bogʻlamasdan, uni ilmiy jihatdan anglab, osmon goʻzalligidan zavq olib kuzatish maqsadga muvofiq.