Qarishni sekinlashtirishning yangi usuli maʼlum qilindi

Qayd etilishicha, Shveysariya olimlari tomonidan "Nature Aging" xalqaro ilmiy jurnalida eʼlon qilingan tadqiqot natijasi keng jamoatchilikda katta qiziqish uygʻotmoqda. Unda insonning qarish jarayonini sekinlashtirishga doir samarali usul haqida soʻz yuritiladi. 

Uch yil davom etgan keng qamrovli tadqiqotda 70 va undan katta yoshdagi 2000 nafardan ortiq sogʻlom odamlar ishtirok etgan. Tajriba qatnashchilari ikki guruhga boʻlingan holda, belgilangan muddatda "D" hamda Omega-3 vitaminlarini turli kombinatsiyalarda qabul qilib, jismoniy mashgʻulotlar bilan shugʻullandi. 

Eng samarali natija Omega-3 darmondorisini qabul qilgan guruhda qayd etilgan: tegishli tekshiruvlardan soʻng ularda hujayralarning qarishi sezilarli darajada sekinlashgani aniqlangan. Oʻz navbatida, "D" vitamini va jismoniy mashgʻulotlar ham ijobiy natija berishi maʼlum boʻldi. 

Olimlarning yakuniy xulosasiga koʻra, Omega-3 va "D" vitaminlari hamda muntazam jismoniy mashqlarni oʻz ichiga olgan kompleks yondashuv insonlarda qarish tezligini 1-4 foizga sekinlashtirishi mumkin.