Aholini roʻyxatga olishga tayyorgarlik boshlandi

Prezidentning 173-son farmoni ijrosini taʼminlash maqsadida Oʻzbekistonda aholi va qishloq xoʻjaligini roʻyxatga olishga tayyorgarlik koʻrish va uni oʻtkazish tartibi toʻgʻrisidagi nizom tasdiqlandi.

Ishchi guruh bir oy muddatda Milliy statistika qoʻmitasining "Aholini roʻyxatga olish axborot tizimi"ni, shu jumladan qishloq xoʻjaligini hisobga olish soʻrovnomalarini sinovdan oʻtkazadi va uzluksiz ishlashini taʼminlaydi.

2025 yil 15 oktabrga qadar "mahalla yettiligi" xodimlarining planshet qurilmalari sinovdan oʻtkazilib, ularga axborot tizimi oʻrnatiladi. 2025 yil 1 noyabrga qadar roʻyxatdan oʻtish jarayonini texnik qoʻllab-quvvatlash uchun "Koll-markaz" tashkil etish ishlari yakunlanadi.

Aholini roʻyxatga olish 2026 yil 15 yanvardan 28 fevralgacha oʻtkaziladi va roʻyxatga olishning boshlanish vaqti 2026 yil 15 yanvar soat 00:00 etib belgilandi. Roʻyxatdan oʻtish muddati 45 kun.

Respondentlarning shaxsiy va qishloq xoʻjaligi maʼlumotlarini toʻplashda roʻyxatga olingan sanadan keyingi oʻzgarishlar hisobga olinmaydi.

Xususan, 2026 yil 15 yanvardan keyin tugʻilgan bolalarga roʻyxatga olish varaqasi va boshqa roʻyxatga olish hujjatlari toʻldirilmaydi, balki roʻyxatga olish sanasidan keyin vafot etgan shaxslarga toʻldiriladi.

Shunga oʻxshash roʻyxatga olish hujjatlari 2026 yil 15 yanvardan keyin fermaga olib kelingan yoki tugʻilgan yangi chorva mollari uchun toʻldirilmaydi, balki roʻyxatga olish sanasidan keyin nobud boʻlgan, soʻyilgan yoki sotilgan, shuningdek boshqa sabablarga koʻra fermadan olib chiqib ketilgan chorva mollari uchun toʻldiriladi.

Aholi soni va uning tarkibini hisoblashda quyidagilar hisobga olinmaydi:

mamlakat hududida bir yildan ortiq boʻlmagan Oʻzbekiston fuqarolari;

Tashqi ishlar vazirligi huzurida akkreditatsiya qilingan xorijiy davlatlarning doimiy vakolatxonalari, xalqaro, hukumatlararo tashkilotlar va xorijiy davlatlarning davlat tashkilotlari vakolatxonalari xodimlari boʻlgan chet el fuqarolari, shuningdek ularning oila aʼzolari;

Oʻzbekiston Respublikasining xalqaro shartnomalariga muvofiq diplomatik imtiyozlarga ega boʻlgan shaxslar.

Qaror bilan quyidagilar ham tasdiqlandi:

Oʻzbekiston Respublikasida aholini va qishloq xoʻjaligini roʻyxatga olish dasturi;

Oʻzbekiston Respublikasida aholi va qishloq xoʻjaligini roʻyxatga olishni oʻtkazish uchun soʻrovnoma shakllari roʻyxati;

Aholini va qishloq xoʻjaligini roʻyxatga olishga tayyorgarlik koʻrish va uni oʻtkazish hamda uning natijalarini eʼlon qilish boʻyicha tadbirlar rejasi;

Aholini va qishloq xoʻjaligini roʻyxatga olishni oʻtkazishda axborot-kommunikatsiya texnologiyalaridan samarali foydalanish va axborot xavfsizligini taʼminlash boʻyicha ishchi guruh tarkibi;

Aholini va qishloq xoʻjaligini roʻyxatga olishning ahamiyati va mazmunini targʻib qilish boʻyicha media reja.