“ALHADAYA” biologik faol qoʻshimchasi reklamasi uchun moliyaviy jarima qoʻllanildi

Ijtimoiy tarmoqlarda keng muhokamalarga sabab boʻlgan “Alhadaya” biologik faol qoʻshimchasi reklamasi yuzasidan tegishli oʻrganish ishlari olib borildi.

Tekshiruv natijalariga koʻra, reklama materiallarida taʼsir xususiyatiga ega boʻlmagan iboralar qoʻllangani, mahsulot toʻgʻrisida toʻliq maʼlumot berilmagani hamda uning terapevtik samaradorligi va kasalliklarni yengillashtirishi haqidagi daʼvolar keltirilgani aniqlangan. 

Maʼlum qilinishicha, “Reklama toʻgʻrisida”gi Qonunning 35-moddasiga muvofiq, ovqatga qoʻshiladigan biologik faol qoʻshimchalar reklamasi dori vositasi sifatida talqin qilinishiga yoʻl qoʻymasligi, davolash xususiyatlari haqida tasavvur uygʻotmasligi hamda ragʻbatlantiruvchi aksiyalar bilan targʻib etilmasligi shart.

Qoʻmita Maxsus komissiyasi tomonidan qonun talablari buzilgani alomatlari bilan “ALHADAYA NEW” MChJga nisbatan ish qoʻzgʻatildi. Ishni koʻrib chiqish yakunlariga koʻra, kompaniyaga moliyaviy jarima qoʻllash toʻgʻrisida qaror qabul qilingan.

Shuningdek, aniqlangan qonunbuzilishlarni bartaraf etish va bunday holatlarga kelgusida yoʻl qoʻymaslik yuzasidan majburiy koʻrsatma berilgan.