OAVlar yoritayotgan 328 ta reklama qonunchilikka toʻgʻri kelmaydi — Rakobat komitasi

Qayd etilishicha, qoʻmita tomonidan ommaviy axborot vositalari va ijtimoiy tarmoqlardagi reklama materiallarining qonun hujjatlariga qay darajada rioya qilinayotgani koʻzdan kechirilgan. Oʻrganishlar davomida joriy yilning oʻtgan davri mobaynida jami 2205 ta reklama ijtimoiy tarmoqlarda aylanayotgani aniqlangan. 

Shundan 328 ta reklamada qonunchilikka nomuvofiqlik holatlari kuzatilib, tegishli koʻrsatmalar bilan bartaraf etilgan. Shuningdek, qonunbuzilish holatlarini ixtiyoriy bartaraf etmagan xoʻjalik yurituvchi subʼektlarga nisbatan ish qoʻzgʻatilgan. 

Andijon viloyatida faoliyat yurituvchi "Taraqqiyot TV" telekanali orqali "Qomus kapsulalari" biologik faol qoʻshimchasi reklamasi eʼlon qilinayotgani kuzatilgan. Mazkur reklama oʻrganilganda unda chalgʻituvchi va boʻrttiruvchi iboralar qoʻllanilgani aniqlangan. 

Soʻng ushbu telekanal "Reklama toʻgʻrisida"gi qonunning 16-, 34- va 35-moddalari talablari buzganlikda ayblanib, hududiy boshqarmaning maxsus komissiyasi tomonidan "Taraqqiyot TV"ga  nisbatan ish qoʻzgʻatilgan va efirida ketayotgan mahsulotining reklamasi olib tashlangan. 

Shu kabi holat Toshkent shahrida ham kuzatilgan. "Jit Zdorovo" gazetasida chop etilgan "Neoflex" BFQ reklamasi tekshiruvdan oʻtkazilganda qonunbuzarlik holatlari yuzaga chiqqan. Hududiy boshqarma maxsus komissiyasi tomonidan "PAKSTAMPA" MChJga nisbatan jarima belgilagan hamda masʼullariga nisbatan maʼmuriy choralar koʻllagan.

Shuningdek, Namangan viloyati hududiy boshqarmasi tomonidan "Mahalla" telekanali orqali "Fitoplyus" hamda "Gemorroid" mahsulotlari reklamasida ham qonun buzilish holatlari ochiqlangan. Soʻng hududiy boshqarmaning tegishli koʻrsatmasiga asosan "HERBAL MED" MChJ tomonidan qonun talablariga zid boʻlgan holatlar bartaraf etilgan.

Yana Samarqand va Sirdaryo viloyatlari hududida ham turli Telegram-kanallari ("Sirdaryo moshina bozor", "Gulistonliklar Rasmiy", "Guliston Olx Sirdaryo ", "Samarqandliklar_Samarqand24", "Samarqand100", "Nurobod OLX")  orqali biologik faol qoʻshimchalarning ("Gemoroydan xalos etuvchi", "Disaar", "Stop diabet-No diabet") qonunga zid reklamalari tarqatilgan holatlar aniqlangan. Soʻng kanal adminlariga tushuntirish va ogohlantirish berilgan va reklama materiallari kanallardan olib tashlangan.