Allamjonovga suiqasd qilinganiga bir oy boʻldi. Nimalar maʼlum?

Joriy yilning 26 oktabr sanasida Bosh prokuratura Toshkent viloyati Qibray tumanida fuqaro S.S. boshqaruvidagi "Range Rover" rusumli avtomashinaga qarata ikki nafar nomaʼlum shaxs oʻqotar quroldan bir necha marotaba oʻq uzib, qasddan odam oʻldirishga harakat qilib, nomaʼlum tomonga yashiringanini maʼlum qildi. 

Soʻng mazkur holat yuzasidan Jinoyat kodeksining 25, 97-(Qasddan odam oʻldirishga suiqasd qilish) hamda 248-(Oʻqotar qurolning, oʻq-dorilarning, oʻqotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) moddalari bilan jinoyat ishi qoʻzgʻatildi. 

27-oktabr kuni esa oʻtkazilgan tergov va tezkor qidiruv tadbirlari davomida ushbu jinoyatni sodir etgan shaxslarning bir nafari aniqlanib, gumonlanuvchi tariqasida ushlandi. Aynan shu vaqt orasida ijtimoiy tarmoq faollari Allamjonovga qilingan suiqasdni turlicha talqin qilishni boshladi. Xususan, jurnalist Anora Sodiqova Allamjonovga qilingan suiqasd feyk emas ekanligini bildirib, qattiq xavotirda ekanligini yozdi.

"Demak, Allamjonovga qilingan suiqasd feyk emas, rost. Qattiq xavotirdamiz. Rasmiy bayonot eʼlon qilindi. Unda bu tasdiqlandi", deb yozadi jurnalist.

"Gazeta.uz" bosh muharriri Muhrim Agzamkhodjayev esa "Gazeta.uz" nashrida eʼlon qilingan xabarni Telegram’dagi sahifasida ulashib, Allamjonovga suiqasd uyushtirilganini tasdiqlagan. 

"Dasturimizni yana Qibray yangiliklari bilan davom ettiramiz", deya kanaliga rasm joylagan u.

Shu kabi xabar tarmoqlarda aylangandan keyin Bosh prokuratura OAV vakillariga ogohlantirish bilan chiqdi.

"Soʻnggi kunlarda Bosh prokuratura tomonidan tergov qilinayotgan jinoyat ishi yuzasidan ijtimoiy tarmoqlar orqali tasdiqlanmagan va asossiz, shuningdek, ishonchli rasmiy manbalarga tayanilmagan maʼlumotlar keng tarqatilmoqda. Holbuki, holat yuzasidan tegishli idoralarning malakali xodimlaridan iborat tezkor-tergov guruhi tuzilib, tergov harakatlari davom etayotgani haqida xabar berilgan. Tafsilotlar haqida qoʻshimcha ravishda xabar beriladi" deyiladi xabarda.

Bundan tashqari, prokuratura faol va katta auditoriyaga ega blogerlar, ijtimoiy tarmoqlardagi guruh va kanallar maʼmurlariga xuddi davlat organlaridan talab etilgani kabi sohaga oid amaldagi qonunchilik meʼyorlariga rioya etishlari shart ekanligini unutmasligini aytgan.

"Jamoatchilik orasida turli notoʻgʻri talqin va taxminlar tarqalishining oldini olish maqsadida, ommaviy axborot vositalaridan prokuratura organlari xodimlari tomonidan oʻtkazilgan tezkor yoki tergov tadbirlarini yoritishda faqat Bosh prokuratura matbuot xizmati tomonidan taqdim etilgan rasmiy maʼlumotlarga tayanish va havola keltirishni qatʼiy soʻrab qolamiz. Aholi orasida yolgʻon, haqiqatga toʻgʻri kelmaydigan va vahima chiqarishga qaratilgan materiallarni har qanday shaklda tarqatish uchun jinoiy javobgarlik bor", deya qoʻshimcha qilgan Bosh prokuratura ogohlantirishida.

Joriy yilning 28 oktabr kuni Bosh prokuratura tomonidan oʻtkazilgan tergov va tezkor qidiruv tadbirlari davomida Allamjonov ishi boʻyicha yana uch nafar gumonlanuvchi aniqlanib, ushlangani maʼlum qilindi. 

Keyin xorijiy nashrlar mazkur suiqasdda Checheniston rahbari Ramzan Qodirovning aloqasi borliligini yozishdi. Qodirov esa buni inkor qilib oʻzining Telegram’dagi sahifasida post yozdi. Postda u yuqoridagi gaplarni "siyosiy oʻyin" hamda "oʻzbeklar va chechenlar oʻrtasida nizo keltirib chiqarishga qaratilgan harakat", deya baholadi. 

"Oʻzbekistonda bir necha hafta oldin Prezident administratsiyasining sobiq xodimi boʻlgan mashinaga qarata oʻq uzilgan edi. Hech kim jabrlanmadi. Gumonlanuvchilardan biri allaqachon hibsga olingan, tergov barcha ishtirokchilarni va suiqasd sabablarini aniqlashi kerak. Biroq, natijalarni kutmasdan, gʻarbparast va baʼzi muxolifat nashrlar "chechen izi" haqidagi versiyani oʻrtaga tashladi, keyin bu izni butunlay menga bogʻlashdi", deb yozgan Qodirov.

Shuningdek, Checheniston yetakchisi bu "provokatsiya"ga javob bermasligini taʼkidlagan.

"Men bu provokatsion narsalarga javob bermayman. Qolaversa, Oʻzbekistonda Shavkat Mirziyoyevning oqilona siyosati tufayli barcha sohalar, jumladan, axborot va huquq-tartibot tizimidagi ishlar aʼlo darajada. Qoʻshimcha qilamanki, agar men haqiqatan ham biror narsani rejalashtiradigan boʻlsam, bu ishni 100 foiz natija bilan oxiriga yetkazaman", deya qoʻshimcha qilgan Qodirov.

Bundan tashqari, Ramzan Qodirov bu xabarlarni siyosiy oʻyin va oʻzbeklar bilan chechenlar oʻrtasida nizo keltirib chiqarishga qaratilgan harakat sifatida baholagan.

"Chechenlar va oʻzbeklar tarixiy oʻtmishi umumiy boʻlgan qardosh xalqlardir. Bizning umumiy jihatlarimiz juda koʻp. Shaxsan men uchun Oʻzbekiston – oʻzbek xalqini, uning odob-axloqini sevgan aziz otam Ahmad Hoji hayotining alohida va muhim qismidir. Va men bu maʼlumotlarni uchinchi tomonlarning siyosiy oʻyin quroli va mamlakatlarimiz oʻrtasida nizo keltirib chiqarishga qaratilgan ochiq urinish sifatida baholayman. Ishonchim komilki, Gʻarbning soxta uslubiga boshqa nashrlar ham ergashadi. Qanday boʻlmasin, men va Oʻzbekistondagi aziz birodarlarim bu provokatsion maʼlumotlar ortida kim turganini bilib olamiz. Bu borada ishlar allaqachon boshlangan", deya postni yakunlagan Ramzan Qodirov.

Bosh prokuratura dastlab ikki nafar shaxsni Allamjonov ishi boʻyicha qoʻlga olgandi. Kecha, 25 noyabr kuni Allamjonov ishi boʻyicha gumonlanuvchilar soni yana 5 nafarga ortganini, shulardan ikki nafari qidiruvda ekanligini  maʼlum qildi.

"Oʻtkazilgan tergov va tezkor–qidiruv tadbirlari davomida ushbu jinoyatni sodir etishga aloqador boʻlgan jami 7 nafar shaxs aniqlanib, 5 nafariga nisbatan qamoqqa olish ehtiyot chorasi qoʻllanildi, shuningdek 2 nafariga nisbatan qidiruv eʼlon qilingan edi. Qidiruvda boʻlgan ayblanuvchi K.S.ning Qozogʻiston Respublikasida yashiringan manzili aniqlanib, uning ishtirokida tergov harakatlari olib borildi. Shuningdek, qidiruvda boʻlgan ayblanuvchi Javlon Yunusov Janubiy Koreya Respublikasida qoʻlga olinib, Oʻzbekistonga ekstraditsiya qilindi", deyiladi prokuratura xabarida.

Ammo oʻqdan omon qolgan Allamjonov yuqoridagi holat yuzasidan hanuzgacha oʻz fikrini bildirgani yoʻq.