Avval OʻzJOKU, endi esa Milliy: Universitet rahbariyatiga salom bermagan talaba jazolandi

"2024 yilning 7 oktabr kuni xayol bilan maʼnaviy- maʼrifiy ishlar boʻyicha dekan oʻrinbosari U.E.Qurbonovga va boshqa ustozlarga salom bermaganim uchun uzr soʻrayman. Bu holat boshqa takrorlanmaydi", deya yozgan talaba.

Mazkur xabar tarmoqlarda bir kun aylanganidan soʻng, holat boʻyicha Milliy universiteti rasmiy munosabat bildirib chiqdi. Unga koʻra, talabadan salom bermagani uchun tushuntirish xati olinmagan.

"Ijtimoiy tarmoqlarda tarqalgan xabar va postlarga javoban shuni maʼlum qilamizki, Oʻzbekiston Milliy universitetida yoshlar bilan ishlash boʻyicha dekan oʻrinbosari va boshqa ustozlarga salom bermagani uchun hech qanday masʼul tomonidan talabadan tushuntirish xati yozdirib olinmagan", deyiladi izohda.

Shuningdek, xabarda Milliy universiteti talabalarning ustozlarga hurmat bilan munosabatda boʻlishi, salom berishi yoki bermasligi ularning shaxsiy madaniyatiga taalluqli masala ekaniga toʻxtab oʻtilgan. Biroq munosabatda talabaning uzr soʻrab, tushuntirish xati yozishga majburlangani yuzasidan izoh berilmagan. 

Mazkur holatni ijtimoiy tarmoq foydalanuvchilari turlicha talqin qilmoqda. Ayrimlar talaba salom bermasa, madaniyatsiz boʻlib qolmasligini, salom bermaganlik uchun jazolash ahmoqlikdan boshqa narsa emasligini aytayotgan boʻlsa, boshqa bir tarmoq foydalanuvchisi universitet rahbariyati tinch ketayotgan bolani toʻxtatib, bekorga tanbeh bermasa kerak degan izohlarni qoldirgan.

Ushbu holat avvalroq OʻzJOKU (Oʻzbekiston jurnalistika va ommaviy kommunikatsiyalar universiteti)da ham kuzatilgan. Unda talaba universitet rektoriga salom bermagani uchun xodim tomonidan kaltaklangani aytilgan edi. Shunda ham yuqoridagi kabi universitet rektori Sherzodxon Qudratxoʻja bu voqeadan xabari yoʻqligini, nohaq harakat qilganlar jazolanganini, talabaning salom berish-bermasligi ixtiyoriy ekanligini aytgan edi.