Bogʻcha bolalariga zaharli ilonlar bilan tomosha koʻrsatildi

Qayd etilishicha, voqea joriy yilning 16 yanvar kuni Toshkent viloyati Piskent tumanidagi 7-sonli davlat maktabgacha taʼlim muassasasida kuzatilgan. 

Tarmoqlarda tarqalgan videoda tarbiyalanuvchilarga noyob, "Qizil kitob"ga kiritilgan Oʻrta Osiyo kobralari bilan tomosha uyushtirilganligi va bunda bogʻcha maʼmuriyati tomonidan bolalarning hayoti va sogʻligʻi uchun xavfsizlik choralari taʼminlanmaganligi aks etgan. 

Maʼlum qilinishicha, tomoshalar Olmaliq shahar "Kumush diyor" xususiy korxonasi tasarrufidagi "Toshkent" havaskorlik sirk jamoasi xodimi H.A. tomonidan uyushtirilgan. 

Mazkur shaxs oʻquv yili avvalida tuman maktabgacha va maktab taʼlimi boʻlimiga sirk tomoshalarini namoyish qilish boʻyicha xat va dastur bilan murojaat qilgan. Masʼullar tomonidan ushbu tomoshalarga ruxsat berilgan. Namoyishlar dasturida hayvonlar bilan sahna koʻrinishlari koʻrsatilmagan. 

16 yanvar kuni esa H.A. tumandagi 7-sonli davlat maktabgacha taʼlim tashkilotida bolalarning hayoti va sogʻligi uchun xavfli boʻlgan jonzotlar bilan oʻyin koʻrsatgan. 

"Toshkent viloyati Maktabgacha va maktab taʼlimi boshqarmasi tomonidan ishchi guruh tuzilib, oʻrganish ishlari olib borildi. Ishchi guruh xulosasi bilan holatga bevosita masʼul boʻlgan, eʼtiborsizlik qilgan shaxslarga nisbatan chora koʻrildi", deyiladi boshqarma munosabatida.