Chiqindidan qarzdor isteʼmolchilar elektr energiyasidan uzib qoʻyilmaydi

Qayd etilishicha, Ekologiya, atrof-muhitni muhofaza qilish va iqlim oʻzgarishi vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi tomonidan chiqindi tashish va olib ketish xizmatida foydalanuvchilarga qulaylik yaratish maqsadida yangi "Toza Makon-billing" dasturiy kompleksi ishga tushiriladi. Shu munosabat bilan joriy yilning 31 oktabr kuni soat 23:50 dan 5 noyabr soat 23:50 gacha profilaktik ishlar olib boriladi. 

Agentlik tomonidan mazkur vaqt oraligʻida chiqindi xizmati uchun barcha turdagi toʻlovlarni amalga oshirishda hamda shaxsiy hisob raqamdagi mavjud maʼlumotlarni olish, abonent toʻgʻrisidagi maʼlumotlarni oʻzgartirish, qoʻshish va oʻchirishda vaqtinchalik texnik uzilishlar boʻlishini haqida xabar berilgan.  

Mazkur xabar ijtimoiy tarmoqlarda notoʻgʻri talqin qilinishi oqibatida koʻpgina manbalarda chiqindi xizmatidan qarzi bor fuqarolar elektr quvvatidan ham uzilishi haqida xabarlar tarqalgan. 

"Ammo Prezidentining "Chiqindilarni boshqarish tizimini takomillashtirish va ularning ekologik vaziyatga salbiy taʼsirini kamaytirish boʻyicha chora-tadbirlar toʻgʻrisida"gi Farmoniga asosan isteʼmolchining chiqindi boʻyicha qarzdorlikdan ogohlantirilgandan keyin toʻlov qilmagan shaxslarning elektr uchun toʻlovlarini qabul qilishni vaqtinchalik cheklash amaliyoti joriy etilishi amaliyoti boʻyicha texnik ishlar olib borilmoqda", deyiladi xabarda. 

Bundan xulosa qilish mumkinki, chiqindidan qarzdor isteʼmolchilar elektr quvvatidan uzilishi haqidagi xabarlar asossiz.