Chiqindilarni qayta ishlash boʻyicha loyihalar taqdimot qilindi

Oxirgi uch yilda barcha manbalardan 2 trillion soʻmdan ziyod mablagʻ yoʻnaltirildi. Oʻtgan yili Chiqindilarni boshqarish va sirkulyar iqtisodiyotni rivojlantirish agentligi tashkil etildi.

Chiqindi korxonalari uchun 1 ming 200 ta yangi texnika olib berildi. Mahallalarda chiqindi maydonchalari qurildi. Toʻplash va tashib ketish yaxshilangani natijasida bu tarmoq ikkilamchi xomashyo manbaiga aylandi.

Avvallari davlat monopoliyasida boʻlgan sohada tadbirkorlikka yoʻl ochilib, qulay biznes muhiti yaratildi. Jumladan, sanitar-tozalash hamda chiqindini qayta ishlash korxonalari uchun foyda soligʻi va ijtimoiy soliq stavkalari 1 foiz etib belgilandi. Chetdan olib kelinadigan texnika va uskunalar import bojidan ozod qilindi. Natijada 200 ga yaqin sanitar-tozalash va 290 ta chiqindini qayta ishlash korxonalari ochildi.

Taqdimotda mutasaddilar sohadagi loyihalarning borishi va galdagi rejalar haqida axborot berdi.

Yurtimizda yiliga 14 million tonna maishiy chiqindi hosil boʻladi. Lekin ularni qayta ishlash darajasi past. Soʻnggi yillardagi loyihalar natijasida bu endi 5 foizga yetdi.

Chiqindini yoqish orqali energiya ishlab chiqarish loyihalari qoʻllab-quvvatlanmoqda. Xitoylik investorlar 6 ta viloyatda shunday zavodlar qurayapti. Davlat chiqindi utilizatsiyasi uchun ularga toʻlov qilish bilan birga, hosil boʻlgan energiyani sotib olish boʻyicha ham majburiyat olayapti.

Yaqinda Toshkent shahrida tibbiyot chiqindisini yoqib, issiqlik oladigan ikkita korxona ishga tushirildi. Yana Samarqandda 2 ta, qolgan hududlarda bittadan shunday zavodlar qurilishi moʻljallangan.

Maishiy chiqindilarning toʻrtdan biri qogʻoz, plastik, rezina, shisha, toʻqimachilik qoldiqlariga toʻgʻri keladi. Ularni qayta ishlab, 1 trillion soʻmlik mahsulot olish mumkinligi aytildi. Bundan tashqari, yurtimizda qayta ishlanmaydigan qurilish, kimyo, elektron, texnik va sanoat moylari boʻyicha katta zaxira borligi koʻrsatib oʻtildi.

Chiqindini tashib ketish xizmatlari aholini rozi qiladigan darajada boʻlishi kerakligi taʼkidlandi. Shu bois mahallaga chiqindi texnikasining kelish vaqti va harakatini onlayn koʻrish imkoniyatini yaratish vazifasi qoʻyildi.

Ijtimoiy muassasalar va mahallalarni chiqindi konteynerlari bilan toʻliq taʼminlash boʻyicha ikki yillik dastur ishlab chiqilishi belgilandi. Aholida ekologik madaniyatni bogʻcha va maktabdan boshlab shakllantirish muhimligi taʼkidlandi.