Davlat idoralari koʻchishi ortidan binolar sotilmoqda

 Soʻnggi kunlarda ketma-ket oʻtkazilgan uchta savdo natijalari davlat mulkining haqiqiy bozor bahosini, shuningdek, ushbu jarayonda faol ishtirok etayotgan xususiy kompaniyalar manfaatini yaqqol namoyon etdi.

Qurilish va kommunal xoʻjalik vazirligi binosi — 182,4 milliard soʻm

Abay koʻchasida joylashgan, 48 sotix maydonni egallagan Qurilish va kommunal xoʻjalik vazirligi binosi boʻyicha auksion toʻrt ishtirokchi oʻrtasida oʻtdi. Boshlangʻich narx 130,3 milliard soʻm etib belgilangan edi.

Savdoda gʻoliblikni “Oʻzshahar qurilish invest” kompaniyasi qoʻlga kiritdi va bino 182,4 milliard soʻmga sotildi.

2017 yilda Mirobod tumanida roʻyxatdan oʻtgan ushbu kompaniya turar joy qurilishi bilan shugʻullanadi. Kompaniyaning 100 foiz ulushi Nuriddin Qodirovga tegishli, boshqaruv esa Baxtiyor Saatov zimmasida. Auksion materiallariga koʻra, xaridor Prezidentning 2019 yildagi farmoni asosida berilgan imtiyozlardan foydalanib, obʼekt uchun toʻlovni 36 oy davomida boʻlib-boʻlib amalga oshirish huquqiga ega boʻlgan.

Transport vazirligi binosi — 187,7 milliard soʻm

Navbatdagi lot — Zulfiyaxonim koʻchasida joylashgan Transport vazirligi binosi boʻldi. 62 sotix maydonga ega ushbu obʼekt uchun boshlangʻich narx 110,4 milliard soʻm etib belgilandi.

Uch ishtirokchi oʻrtasidagi savdo bir soatdan ortiq davom etdi va narx 14 marta oshirildi. Yakunda bino 187,7 milliard soʻm taklif qilgan Qoraqalpogʻistondagi “Samarador” kompaniyasiga sotildi.

2017 yilda tashkil etilgan ushbu kompaniya 25 milliard soʻm ustav kapitaliga ega. Uning asoschisi Baxtiyor Maxkamov boʻlib, u poytaxtda faoliyat yuritayotgan yana bir qator qurilish korxonalarining ham egasi hisoblanadi.

Avtomobil yoʻllari qoʻmitasi binosi — 242 milliard soʻm

18 dekabr kuni oʻtkazilgan navbatdagi auksion eng yirik summa bilan yodda qoldi. Mirzo Ulugʻbek tumanida, Hamid Olimjon metro bekati yaqinida joylashgan, 1975 yilda qurilgan va 1 gektardan ortiq maydonni egallagan Avtomobil yoʻllari qoʻmitasi binosi 242 milliard soʻmga sotildi.

Eng yuqori taklifni Qobiljon Norbekov bildirgan. Xarid muddatli toʻlov asosida amalga oshiriladi.

Maʼlum qilinishicha, qoʻmita Yangi Toshkentga koʻchib oʻtishni rejalashtirmoqda va uch yil ichida binoni toʻliq boʻshatib berish majburiyatini olgan. Agar yangi maʼmuriy bino belgilangan muddatdan oldin tayyor boʻlsa, mavjud bino xaridorga shunga muvofiq ravishda ertaroq topshiriladi.

Markazdan chekinish — yirik xususiy investorlar uchun imkoniyat

Uchta auksion yakunlariga koʻra, davlat mulki hisoblangan binolar jami hisobda 612 milliard soʻmdan ortiq summaga sotildi. Xaridorlarning aksariyati qurilish sohasi vakillari boʻlib, ular poytaxt markazida katta yer maydonlariga ega boʻlish imkoniyatidan foydalanmoqda.

Davlat idoralarining Yangi Toshkentga koʻchirilishi jarayoni endigina boshlanganini inobatga olsak, yaqin oylar va yillarda bunday savdolar soni ortishi, poytaxt markazidagi koʻchmas mulk esa bozorning eng qimmat aktivlaridan biriga aylanishi kutilmoqda.