Qashqadaryoda fermerning yeri oʻzidan bexabar auksionga chiqarildi

Bu haqda Biznes-ombudsman matbuot xizmati xabar qildi.

Maʼlum qilinishicha, viloyatning Koʻkdala tumanida faoliyat yuritayotgan “A.M.Ch.” fermer xoʻjaligiga tegishli yer maydonini zaxiraga qaytarish toʻgʻrisidagi qarordan norozi boʻlib, Biznes-ombudsmanga murojaat qilgan.

Oʻrganishlar davomida xalq deputatlari tuman kengashi qarori bilan fermer xoʻjaligiga tegishli 500 gektar yer maydoni “oʻz xohishi bilan qaytarilgan” degan asosda davlat zaxirasiga olingani va auksionga chiqarilgani aniqlangan. Biroq fermer tomonidan yerdan voz kechish boʻyicha notarial tasdiqlangan ariza berilmagan.

Qayd etilishicha, 2022 yil 1 sentabrdan boshlab yer uchastkasidagi huquqdan ixtiyoriy ravishda voz kechish holatlarida ushbu huquqni bekor qilishni Vazirlar Mahkamasi yoki mahalliy davlat hokimiyati organlari qarorlari bilan rasmiylashtirish amaliyoti bekor qilingan. Hozirda yer uchastkasidan ixtiyoriy voz kechish toʻgʻrisidagi notarial tasdiqlangan ariza yerga boʻlgan huquqlarni bekor qilish uchun yagona asos hisoblanadi.

Mazkur holat yuzasidan Qashqadaryo viloyati xalq deputatlari kengashi tomonidan quyi boʻgʻin kengashining noqonuniy qarori bekor qilindi.