Dzyudochilarimiz “Cadets Asian Cups 2025”ning ilk kunida 16 medalli boʻldi

Qozogʻistonning Olmaota shahrida dzyudo boʻyicha oʻtkazilayotgan “Almaty Cadets Asian Cups 2025”ning ilk kungi bahslari yakunida Oʻzbekiston terma jamoasi 16 ta medallar shodasiga ega chiqdi.

Bahslarda 4 qitʼaning 10 davlatidan 459 nafar yosh dzyudochilar kurash olib bormoqda.

Turnirning ilk kunida oʻgʻil bolalar -50, -55, -60, -66 kilogrammda, qizlar -40, -44, -48 va -52 kg vazn toifalarida tatamiga chiqishdi. Bellashuvlar davomida hamyurtlarimiz 4 ta oltin, 6 ta kumush, 6 ta bronza medalini qoʻlga kiritib, umumjamoa hisobida 1-oʻrinni egalladi.

"Cadets Asian Cups 2025" musobaqalarining dastlabki kungi gʻolib va sovrindorlarini taqdirlash marosimida Oʻzbekiston sporti mutasaddilari, xususan Oʻzbekiston sport vaziri A.Ikromov, Milliy olimpiya qoʻmitasi raisining birinchi oʻrinbosari O.Umarov va boshqalar qatnashdi.

Olmaotadagi qiziqarli bellashuvlar davom etmoqda.