Eron havo hududi yopilishi sabab bir qator reyslar ortga qaytdi

Uzbekistan Airports matbuot xizmatiga koʻra, quyidagi reyslar ortga qaytgan:

• Fly One Asia aviakompaniyasining 7Q7742 reysi (Madina—Toshkent) va 7Q4442 reysi (Madina—Fargʻona) — Madina aeroportiga;
• Jazeera Airways’ning J9650 reysi (Toshkent—Quvayt) — Toshkent aeroportiga;
• Sam Air’ning 9S3303 reysi (Samarqand—Jidda) — Samarqand aeroportiga;
• Fly Khiva’ning 2U7911 reysi (Urganch—Madina) — Urganch aeroportiga;
• Uzbekistan Airways’ning HY336 reysi (Jidda—Toshkent) — Jidda aeroportiga.

Maʼlum qilinishicha, Eron maxsus ruxsat etilgan parvozlardan tashqari barcha reyslar uchun oʻz havo hududini yopgan. Mamlakatda 2025 yil dekabr oyi oxiridan beri norozilik namoyishlari davom etmoqda.

Oʻzbekiston Tashqi ishlar vazirligi Eronda boʻlib turgan Oʻzbekiston fuqarolarini miting va namoyishlarda ishtirok etmaslikka, odamlar koʻp toʻplanadigan joylardan yiroq boʻlishga hamda shaxsiy xavfsizlik qoidalariga qatʼiy rioya etishga chaqirdi.