Qurilish uchun Oʻrta Chirchiq tumanidagi Xalqobod va Yangiyoʻl mahallalaridan yer maydonlari ajratilgan. Bu hududlarda yashovchi fuqarolar hamda fermer xoʻjaliklariga tegishli bino-inshootlar uchun belgilangan tartibda kompensatsiya toʻlovlari amalga oshiriladi.

Tuman hokimi aholi va fermerlar bilan uchrashuv oʻtkazib, kompensatsiya mexanizmi, hujjatlar rasmiylashtirilishi hamda buziladigan obʼektlar boʻyicha tushuntirishlar berdi.

Yangi Toshkent xalqaro aeroporti loyihasi haqida
Loyiha qurilishiga 2025-yil 20-oktabr kuni Prezident Shavkat Mirziyoyev tomonidan rasmiy start berilgan. Qurilish Saudiya Arabistonining “Vision Invest”, Yaponiyaning “Sojitz” va Koreyaning “Incheon” kompaniyalari ishtirokidagi xalqaro konsorsium bilan hamkorlikda amalga oshirilmoqda.

Loyiha 4 bosqichdan iborat boʻlib, birinchi bosqich uchun 2,5 milliard dollar miqdorida sarmoya kiritiladi.

Yangi Toshkent aeroporti mamlakatning eng yirik logistika va transport markaziga aylanishi kutilmoqda. Qurilish jarayoni xalqaro standartlar asosida olib borilib, mintaqaviy aviatransport tarmogʻining markaziy boʻgʻini boʻlishi rejalashtirilgan.

Texnika imkoniyatlar
Yangi terminal orqali yiliga 20 million yoʻlovchi va 129 ming tonna yuk tashish imkoniyati yaratiladi. Soatiga 30 ta uchish-qoʻnish operatsiyasi amalga oshiriladi. Aeroportda 14 ta teleskopik trap va bir vaqtning oʻzida 62 ta havo kemasini saqlash quvvati boʻladi.

#Aeroport

Yangi aeroport qurilishi uchun aholi uylari buziladimi?