Falastinlik mahbusning qiynoqqa solinganini oshkor qilgan Isroil harbiy prokurori hibsga olindi

Tomer-Yerushalmi oʻtgan hafta armiyaning bosh harbiy advokati lavozimidan isteʼfo bergan. U videoning tarqalishi uchun javobgarlikni oʻz zimmasiga olgan. 2 noyabr kuni u bedarak yoʻqolgan, politsiya Tel-Aviv shimolidagi plyajda topib, hibsga olgan. Bu haqda BBC xabar berdi.

Videoda nima aks etgan edi?

2024 yil avgust oyida Isroil telekanalida videolavha namoyish etilgan. Unda Sde Teyman harbiy bazasida askarlar falastinlik mahbusni kaltaklayotgani va oʻtkir narsa bilan jarohatlayotgani koʻringan. Mahbus ogʻir jarohatlar bilan kasalxonaga yotqizilgan.

Bu ish boʻyicha besh nafar harbiyga «zoʻravonlik va ogʻir tan jarohati yetkazish» aybi qoʻyilgan. Ular ayblovlarni rad etgan.

General Tomer-Yerushalmi tergov vaqtida taʼtilga chiqarilgan. 31 oktabr kuni mudofaa vaziri Isroil Kats u lavozimiga qaytmasligini aytgan. Shundan soʻng Tomer-Yerushalmi isteʼfo bergan.

«Men yolgʻon maʼlumotlarga qarshi kurashish uchun medialarga video berganman. Agar mahbusga nisbatan zoʻravonlik boʻlgan boʻlsa, buni tekshirish — bizning burchimiz», — degan u.

Mudofaa vaziri Isroil Kats uning harakatlarini qoralab:

«Kimki Isroil armiyasiga qarshi tuhmat tarqatsa, u armiya formasida boʻlishga arzimaydi», — degan.

Bosh vazir Binyamin Netanyaxu ham uni qoʻllab-quvvatlab, Sde Teymandagi voqeani Isroil uchun «jamoatchilik oldidagi eng ogʻir hodisalardan biri» deb atagan.

Keyinroq ommaviy axborot vositalari Tomer-Yerushalmi bedarak yoʻqolgani haqida xabar bergan. Qidiruvlar natijasida u Gersliya sohilida topilgan.

3 noyabr kuni politsiya tergov doirasida «maʼlumotlar sizib chiqishi» ishi boʻyicha ikki nafar shaxs hibsga olinganini maʼlum qildi. Ular Tomer-Yerushalmi va sobiq bosh harbiy prokuror, polkovnik Matan Solomosh ekani aytilmoqda.