Фаластинлик маҳбуснинг қийноққа солинганини ошкор қилган Исроил ҳарбий прокурори ҳибсга олинди

Томер-Йерушалми ўтган ҳафта армиянинг бош ҳарбий адвокати лавозимидан истеъфо берган. У видеонинг тарқалиши учун жавобгарликни ўз зиммасига олган. 2 ноябрь куни у бедарак йўқолган, полиция Тель-Авив шимолидаги пляжда топиб, ҳибсга олган. Бу ҳақда BBC хабар берди.

Видеода нима акс этган эди?

2024 йил август ойида Исроил телеканалида видеолавҳа намойиш этилган. Унда Сде Тейман ҳарбий базасида аскарлар фаластинлик маҳбусни калтаклаётгани ва ўткир нарса билан жароҳатлаётгани кўринган. Маҳбус оғир жароҳатлар билан касалхонага ётқизилган.

Бу иш бўйича беш нафар ҳарбийга «зўравонлик ва оғир тан жароҳати етказиш» айби қўйилган. Улар айбловларни рад этган.

Генерал Томер-Йерушалми тергов вақтида таътилга чиқарилган. 31 октябрь куни мудофаа вазири Исроил Кац у лавозимига қайтмаслигини айтган. Шундан сўнг Томер-Йерушалми истеъфо берган.

«Мен ёлғон маълумотларга қарши курашиш учун медиаларга видео берганман. Агар маҳбусга нисбатан зўравонлик бўлган бўлса, буни текшириш — бизнинг бурчимиз», — деган у.

Мудофаа вазири Исроил Кац унинг ҳаракатларини қоралаб:

«Кимки Исроил армиясига қарши туҳмат тарқатса, у армия формасида бўлишга арзимайди», — деган.

Бош вазир Биньямин Нетаньяху ҳам уни қўллаб-қувватлаб, Сде Теймандаги воқеани Исроил учун «жамоатчилик олдидаги энг оғир ҳодисалардан бири» деб атаган.

Кейинроқ оммавий ахборот воситалари Томер-Йерушалми бедарак йўқолгани ҳақида хабар берган. Қидирувлар натижасида у Герцлия соҳилида топилган.

3 ноябрь куни полиция тергов доирасида «маълумотлар сизиб чиқиши» иши бўйича икки нафар шахс ҳибсга олинганини маълум қилди. Улар Томер-Йерушалми ва собиқ бош ҳарбий прокурор, полковник Матан Соломош экани айтилмоқда.