Xitoy gibrid elektromobillari 8 karra koʻp nurlanish chiqaradi — tadqiqot

Xitoy jahon elektromobillar bozorining 62 foizini nazorat qiladi. Ekologik tozaligi koʻp taʼkidlanadigan ana shu elektr ulovlar koʻpayishi baravarida, elektromagnit xavfsizlik muammosi yuzaga chiqmoqda.

«Perm milliy tadqiqot politexnika universiteti» (Rossiya) olimlari taʼkidlashicha, elektromobillar hosil qiluvchi elektromagnit maydonlar inson salomatligi uchun xavfli, jumladan, oʻsma kasalliklari, turli nevrologik buzilishlar, depressiyani keltirib chiqarishi mumkin.

Rus olimlari Xitoyda ishlab chiqarilgan gibrid avtomobillardan kuchli nurlanish taralishini aniqlashdi — meʼyordagidan 8 baravar koʻp!

Tadqiqot ilmiy maqola koʻrinishida eʼlon qilindi. Unda yozilishicha, elektromagnit nurlanish — bizning chor-atrofimizdan oʻrab turgan koʻrinmas toʻlqinlar: quyosh nuridan tortib smartfon va noutbuklargacha ularni taratadi. Kam miqdorda ziyoni yoʻq, inson organizmi tabiiy elektromagnit maydonlari bilan muntazam taʼsirlarga koʻnikkan, biroq uzoq va muntazam taʼsirning oqibati yomon boʻlishi mumkin.

Odatiy avtomobillardan elektromobillarning farqi shundaki, ularning uzatma simlari orqali katta kuchga ega (yuzlab ampergacha) tok oqadi va oʻz-oʻzidan shunga mos kuchdagi elektromagnit maydonini hosil qiladi. Quvvatlash qurilmasi ham zararli nurlar tarqatuvchisi, shu bois uning yaqinida turmagan maʼqul.

Shu bilan birga, asosiy nurlanish manbalari davriy, yaʼni tanaffus bilan ishlovchi anʼanaviy avtomobillarga qaraganda, elektromobillarda bu tizimlar harakat davomida doimiy faol boʻlib, uzluksiz elektromagnit taʼsirini hosil qiladi.