FIFA Jahon chempionati-2034 ni 2035 yilga koʻchirishi mumkin

Dastlab rejaga koʻra, mundial 2034 yilning noyabr–dekabr oylarida oʻtkazilishi kerak edi. Biroq bu sana Ramazon oyiga toʻgʻri kelishi sababli musobaqani oʻsha vaqtda tashkil etish mumkin emasligi qayd etilmoqda.

FIFA prezidenti Janni Infantino mazkur masala muhokama qilinayotganini tasdiqlab, shunday dedi:

«Balki taqvimni optimallashtirish yoʻllari bordir. Biz buni muhokama qilyapmiz, ammo xulosaga shoshilmaslik kerak».

Saudiya Arabistonining iqlim sharoiti ham sanalarni belgilashda muhim omil boʻlmoqda. Yoz oylarida havo harorati +52°C gacha yetgani uchun musobaqani oʻtkazish imkoni boʻlmaydi. Shu sababli Qatardagi 2022 yilgi jahon chempionati ham qishda oʻtkazilgan edi.

Yakuniy qaror saudiyalik tashkilotchilar bilan kelishilgan holda qabul qilinishi va barcha futbol tashkilotlarining manfaatlari inobatga olinishi kutilmoqda.

Mundialni koʻchirish milliy chempionatlar hamda Yevropa klub musobaqalari taqvimini moslashtirishni ham talab etadi.

Maʼlumot uchun: futbol boʻyicha jahon chempionatlari odatda Olimpiya oʻyinlari kabi faqat juft yillarda oʻtkaziladi. Faqat koronavirus pandemiyasi sababli Tokio–2020 Olimpiadasi 2021 yilga koʻchirilgan edi.