FIFA sobiq prezidenti JCh–2026ni boykot qilishga chaqirdi

Blatter AQShda oʻtkaziladigan Jahon chempionatini boykot qilishga chaqirib, buni Tramp maʼmuriyatining mamlakat ichida hamda xalqaro maydondagi siyosati bilan izohladi.

U X ijtimoiy tarmogʻidagi postida Shveysariyaning Der Bund gazetasi bilan oʻtgan haftagi intervyusida jurnalist Mark Pit tomonidan aytilgan fikrlarni qoʻllab-quvvatladi. 

“Agar muhokama qilingan barcha jihatlarni inobatga olsak, muxlislarga beriladigan yagona maslahat — AQShga bormang. Televizor orqali tomosha qilish ancha qulay. Agar borsangiz ham, rasmiylarga yoqmasangiz, darhol keyingi reys bilan ortga qaytarilishingiz mumkin”, degan edi Pit intervyuda shunday degan edi:

Shu tariqa FIFAning sobiq rahbari AQShda oʻtkaziladigan Jahon chempionatini boykot qilishga chaqiruvchilar safiga qoʻshildi.

Maʼlumot uchun, Yozef Blatter 1998–2015 yillar davomida FIFA prezidenti boʻlgan va korrupsiyaga oid tergovlar fonida isteʼfoga chiqqan.

2026 yilgi Jahon chempionati AQSh, Kanada va Meksika hamkorligida 11 iyundan 19 iyulgacha oʻtkazilishi rejalashtirilgan.

Xalqaro futbol jamoatchiligining AQShga nisbatan xavotirlari Trampning Grenlandiya boʻyicha pozitsiyasi, sayohat taqiqlari, shuningdek, migrantlar va immigratsiya siyosatiga qarshi namoyishchilarga nisbatan qoʻllanilgan keskin choralar bilan bogʻliq. Ayniqsa, Minneapolis shahridagi voqealar tanqidga sabab boʻlgan.

Shuningdek, Germaniya futbol federatsiyasi vitse-prezidentlaridan biri Oke Gyottlix Hamburger Morgenpost gazetasiga bergan intervyusida Jahon chempionatini boykot qilish masalasini jiddiy koʻrib chiqish vaqti kelganini aytdi.

Ikki hafta avval Tramp maʼmuriyati Senegal va Kot-d’Ivuardan kelishi kerak boʻlgan muxlislarning safar rejalarini izdan chiqardi. Yangi cheklovlarga koʻra, ushbu davlatlar fuqarolari avvaldan vizasi boʻlmasa, jamoalarini qoʻllab-quvvatlash uchun AQShga kirishi deyarli imkonsiz.

Shuningdek, Jahon chempionatiga yoʻllanma olgan Eron va Gaiti davlatlaridan keladigan muxlislar ham AQShga kiritilmaydi. Bu davlatlar Tramp maʼmuriyati joriy etgan dastlabki sayohat taqiqlari roʻyxatiga kiritilgan.