Forbes dunyodagi eng boy odamlarining yangilangan roʻyxatini taqdim etdi

Forbes jurnali Arno boyligini 233 milliardga baholadi va bu oʻtgan yilgi natijaga (211 milliard dollar) nisbatan 10 foizdan koʻproq oʻsdi. 75 yoshli milliarderning asosiy boyligi LVMH aksiyalari hisoblanadi.

Roʻyxatda ikkinchi oʻrinni, oʻtgan yilgidek, Tesla va SpaceX rahbari Ilon Mask egalladi. Forbes uning boyligini 195 milliard dollarga baholagan. Tadbirkor oʻtgan yilgi natijasini yaxshilagan (180 milliard dollar), biroq 219 milliard dollar boyligi bilan reytingda birinchi oʻrinni egallagan 2019 yildagi koʻrsatkichga erisha olmagan. Mask Tesla aksiyalarining 21 foiziga egalik qiladi.

Kuchli uchlikni Amazon asoschisi Jeff Bezos yopdi. U oʻtgan yilgi reytingga nisbatan oʻz oʻrnini oʻzgartirmadi, lekin natijani sezilarli darajada yaxshiladi: uning kapitali bir yil oldingi 114 milliard dollarga nisbatan 194 milliard dollarga baholandi. Milliarder oʻzi asos solgan IT gigantining 10 foiz aksiyalariga egalik qiladi.

Dunyoning eng badavlat tadbirkorlari oʻntaligiga Meta rahbari (Facebook, Instagram va WhatsApp egasi) Mark Sukerberg(4-oʻrin, 77 milliard dollar), Oracle asoschisi Larri Ellison (5-oʻrin, 141 milliard dollar), Berkshire Hathaway rahbari Uorren Baffet (6-oʻrin, 133 milliard dollar), Microsoft asoschisi Bill Geyts (7-oʻrin, 128 milliard dollar) va korporatsiyaning sobiq bosh direktori Stiv Balmer (8-oʻrin, 121 milliard dollar) kirdi. Hindistonlik tadbirkor, energetika, neft-kimyo, telekommunikatsiya, chakana savdo va moliyaviy xizmatlar sohalarida faoliyat yurituvchi Reliance Industries rahbari Mukesh Ambani 116 milliard dollar boyligi bilan reytingda toʻqqizinchi boʻldi. Yuqori oʻntalikdan Google asoschisi Larri Peyj (10-oʻrin, 114 milliard dollar) ham joy oldi.