Oʻzbekistonda Ramazon hayiti sanasi boʻyicha dastlabki maʼlumot eʼlon qilindi

Bu haqda Oʻzbekiston Respublikasi Adliya vazirligining “Huquqiy axborot” rasmiy kanali orqali xabar berildi.

Rasmiy maʼlumotlarga koʻra:

Bayram munosabati bilan quyidagi kunlar dam olish kunlari sifatida belgilangan:

• 20 mart (juma) — Ramazon hayiti kuni, barcha uchun dam olish kuni
• 21 mart (shanba) — Navroʻz bayrami, barcha uchun dam olish kuni
• 22 mart (yakshanba) — dam olish kuni
• 23 mart (dushanba) — 5 kunlik ish haftasidagi xodimlar uchun dam olish kuni (6 kunlik ish haftasida ish kuni)

Maʼlumki, Oʻzbekistonda Ramazon oyi 2026 yil 19 fevraldan boshlangan. Shu bilan birga, hozirga qadar Ramazon hayiti sanasi boʻyicha Oʻzbekiston musulmonlari idorasi va Din ishlari boʻyicha qoʻmita tomonidan alohida rasmiy bayonot berilmagan.

Shuningdek, mazkur sana yuzasidan davlat rahbari Shavkat Mirziyoyev tomonidan ham alohida qaror imzolanmagan.

Odatda Ramazon hayiti sanasi oy koʻrinishiga qarab, bayram arafasida rasman tasdiqlanadi. Shu sababli jamoatchilik orasida hayit sanasiga oid savollar koʻpaygan edi. Adliya vazirligining mazkur axboroti esa ushbu sanani aniqlashtirishda muhim manbalardan biri sifatida qaralmoqda.