Chorvoqdagi kurortni qurish uchun Emin Agalarov Oʻzbekistonga taklif qilongan — Ekologiya vaziri

23 iyul kuni boʻlib oʻtgan matbuot anjumanida ekologiya, atrof-muhitni muhofaza qilish va iqlim oʻzgarishi vaziri Aziz Abduhakimov ozarbayjonlik tadbirkor Emin Agalarovning Chorvoq suv ombori sohilida Sea Breeze Uzbekistan loyihasini amalga oshirish ehtimoli boʻyicha Oʻzbekistonga taklif qilinganiga izoh berdi.

 

“Respublikaga taklif etilgan developer oʻzidan-oʻzi kelib unaqa qilmayapti bu yerda. Kelib, oʻzidan-oʻzi „Mana, men shu Chorvoqda quraman“, degan gap yoʻq. U, aksincha, tajribali boʻlganligi uchun, u juda ham bir ekologik standartlarga javob beradigan qurilishlarni qilganligi uchun ham Oʻzbekistonga taklif etilyapti. Boʻlmasam, oʻzining juda unaqa bir katta xohishi yoʻq, uning mingta taklifi bor”, — taʼkidladi vazir.

Uning soʻzlariga koʻra,  Agalarov Development kompaniyasi rahbariga mintaqaning boshqa davlatlari va Yevropa ham qiziqish bildirmoqda.

“Hozir, mana, kim eshitgan boʻlsa, uni Qirgʻiziston ham chaqiryapti, Qozogʻistonda ham uning takliflari bor, Turkiyada mana juda katta loyihalarni amalga oshiryapti. Hozir mana Chernogoriyaga borib qilaman, deyapti”, — deya qoʻshimcha qildi Aziz Abduhakimov.

Eslatib oʻtamiz, Chorvoqdagi bunday katta hajmdagi kurortni qurish Toshkent shahrining asosiy suv manbai boʻlgan “Chorvoq” suv omboridagi suvning zaharlanishi va boshqa ekologik omillarni keltirib chiqarish mumkin.